Virðumst hafa meiri breidd en við héldum - segir Atli

Þröstur Ernir Viðarsson blaðamaður Vikudags ræddi við Atla Hilmarsson þjálfara Akureyrar um góða byrjun liðsins í upphafi leiktíðarinnar. Viðtalið birtist í Vikudegi í dag.

„Ég reiknaði kannski ekki með að vinna alla leikina í byrjun en ég held að deildin sé bara mjög jöfn í ár. Við erum búnir að vinna tæpa sigra inn á milli en þetta lítur vel út. Þetta er hins vegar bara nýbyrjað og verður að halda þessu áfram,“ segir Atli.

„Það sem ég er ánægðastur með er hvað þetta hefur dreifst mikið og margir að taka þátt í leiknum. Menn hafa verið að skora fullt af mörkum í leikjum en svo stíga aðrir upp í næsta leik. Guðmundur Hólmar Helgason skoraði til dæmis tólf mörk á móti Fram en svo ekkert í síðasta leik gegn Haukum en það kemur ekki að sök. Bjarni Fritzson skoraði 14 mörk á móti HK í fyrsta leik en svo minna í þeim næsta, þannig að það er ánægjulegt hvað þetta dreifist mikið á milli. Það virðist sem við höfum mikla breidd í liðinu, þó maður hafi ekki haldið það fyrir mót,“ segir Atli.

Um sigurleikinn gegn Haukum síðastliðinn föstudag segir Atli: „Ég var ánægðastur með varnarleikinn í leiknum og einnig var mjög gott að fá Hrein Þór Hauksson inn í liðið. Það voru allir búnir að spila tvo leiki í vikunni en hann kom ferskur inn eftir meiðsli og hleypti aukakrafti í liðið.

Þegar Þröstur Ernir, blaðamaður Vikudags spyr hvort landsleikjahléð núna komi ekki á slæmum tíma miðað við þá siglingu sem liðið hefur verið á, svarar Atli: „Við hefðum alveg getað haldið áfram, en þessir þrír leikir á sex dögum tóku sinn toll og nú er bara tækifæri fyrir strákana að sinna öðrum verkefnum. T.d. eru fjórir leikmenn úr okkar röðum að fara að æfa með U-21 árs landsliðinu,“ segir Atli. Þessir fjórir leikmenn eru Oddur Gretarsson, Guðmundur Hólmar Helgason, Geir Guðmundsson og Hlynur Matthíasson.

Því má svo bæta við að tilkynnt var í dag að Oddur Gretarsson hafi verið valinn í A-landslið Íslands sem leikur gegn heimamönnum í Austurríki á laugardaginn.

Minnum síðan á útileik Akureyrar gegn Val, fimmtudaginn 4. nóvember en félagið stendur fyrir hópferð á leikinn ef næg þátttaka fæst. Sjá nánar hér.