Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
    Fréttir                       Þú flettir milli frétta með örvalyklunum eða smellir á bláu örvarnar! 

Þjálfarar Sveinbjörns þeir Rúnar Sigtryggsson og Atli Hilmarsson um Sveinbjörn





11. desember 2010 - Akureyri handboltafélag skrifar

Sveinbjörn Omeyer Pétursson

Eins og lesendum heimasíðunnar er fullkunnugt var Sveinbjörn Pétursson markvörður Akureyrar Handboltafélags valinn leikmaður októbermánaðar í kosningu heimasíðunnar. Það kom síðan í ljós að Sveinbjörn náði einnig að heilla Guðmund Guðmundsson landsliðsþjálfara sem valdi hann í A landslið Íslands sem lék á heimsbikarmótinu í Svíðþjóð á dögunum. Sveinbjörn sýndi svo sannarlega með frammistöðu sinni á mótinu að hann var traustsins verður og að hér er kominn fram markvörður sem augu handboltaheimsins munu fylgja á næstunni.

Í sunnudagsblaði Morgunblaðsins nú um helgina fjallar Skapti Hallgrímsson blaðamaður um Sveinbjörn og ræðir við Rúnar Sigtryggsson sem þjálfaði Sveinbjörn fyrstu tvö ár Akureyrar og Atla Hilmarsson núverandi þjálfara hans um frammistöðu og eiginleika Sveinbjörns. Hér á eftir fer texti Skapta Hallgrímssonar:

Minnir á Omeyer hinn franska

„Ekki tilviljun að Sveinbjörn varði svona vel gegn Noregi“
Sveinbjörn Pétursson, markvörðurinn ungi hjá Akureyri - handboltafélagi, kórónaði frábæra frammistöðu sína það sem af er vetri með eftirminnilegum hætti í fyrstu tveimur landsleikjum sínum í vikunni; tapi gegn Svíþjóð og þó sérstaklega í sigrinum á Norðmönnum þar sem hann stóð í markinu allan tímann og varði 20 skot.

„Það var ekki tilviljun að Sveinbjörn varði svona vel gegn Noregi. Hann er mjög góður markvörður,“ segir Rúnar Sigtryggsson, sem þjálfaði Sveinbjörn í einn vetur hjá Þór og áfram næstu tvö ár, eftir að KA og Þór hófu samstarf í nafni Akureyrar.

Sveinbjörn, jafnan kallaður Bubbi, flutti í kjölfar foreldra sinna á höfuðborgarsvæðið og gekk til liðs við HK. Lék með Kópavogsliðinu tvo vetur við góðan orðstír en hélt norður á ný í sumar.

„Sveinbjörn er öðruvísi en flestir íslenskir markmenn. Hann er ekki „spriklari“ heldur getur beðið lengi eftir skyttunni vegna þess að hann er svo viðbragðsfljótur. Hann er með mjög sterka fætur, hugsanlega vegna þess að hann var mikið á skíðum sem strákur og snerpan því mikil,“ segir Rúnar. „Þá les hann leikinn mjög vel.“

Atli Hilmarsson, núverandi þjálfari Sveinbjörns hjá Akureyri, tekur í sama streng. „Það sem mér finnst best við Sveinbjörn er að hann les leikinn mjög vel og stúderar andstæðinginn og sjálfan sig með reglulegu millibili. Hann kom ekki í góðu formi til okkar en hefur unnið markvisst í því og verið frábær það sem af er tímabilinu. Honum líður greinilega mjög vel hér á Akureyri,“ segir Atli.

Þegar Rúnar kom heim til Íslands eftir mörg ár í atvinnumennsku á Spáni og í Þýskalandi varð hann samherji Sveinbjörns hjá Þór. „Ég sá strax að hann er mjög fín markmannstýpa. Mér fannst Bubbi satt að segja minna mig á Thierry Omeyer, franska landsliðsmarkvörðinn sem er hjá Kiel og benti honum oft á það. Báðir búa yfir mikilli snerpu. Svo er Sveinbjörn gæddur mjög mikilvægum eiginleika sem keppnismaður: Hann þolir ekki að tapa!“ segir Rúnar.


Thierry Omeyer markvörður Kiel og franska landsliðsins

Atli og Rúnar segja báðir að Sveinbjörn sé ekki orðinn fullnuma. „Hann veit að þetta er stöðug vinna og það er allt annar bragur á alþjóðlegum handbolta og íslensku deildinni. Og æfingaleikir í aðdraganda HM eru öðruvísi en leikir á heimsmeistaramótinu sjálfu,“ segir Atli. „Hann á eftir að bæta sig mikið, en það er auðvitað undir honum sjálfum komið,“ segir Atli. „Gegn Svíum var hann stundum of seinn, því skotin voru miklu fastari en hann er vanur hér heima. En svo áttaði hann sig á því og náði að komast fyrir boltann,“ segir Rúnar.

Báðir sjá hann fyrir sér sem landsliðsmann, „hvort sem er núna á HM eða síðar. Hann hefur a.m.k. minnt rækilega á sig og ég er mjög ánægður með að Guðmundur gaf honum tækifæri. Það var ekki sjálfgefið, en sýnir að tekið er eftir mönnum sem spila í deildinni hér heima,“ segir Atli.

„Sveinbjörn er rosalega einbeittur og ég held að það skipti hann ekki máli hverjar aðstæðurnar eru. Hann getur útilokað þær og einbeitt sér að leiknum sem er mjög mikill kostur. Í spennuleikjum hjá okkur í vetur hefur hann alltaf haldið ró sinni þegar mest liggur við,“ segir Atli. „En það má auðvitað ekki gleyma öðrum leikmönnum liðsins. Vörnin og Sveinbjörn hafa náð að vinna mjög vel saman í vetur,“ segir Atli Hilmarsson.


Sveinbjörn einbeittur ver víti gegn Aftureldingu

Ísfirskur Akureyringur
Sveinbjörn fæddist á Ísafirði 30. nóvember 1988 og bjó vestra þar til hann varð 10 ára. Fjölskyldan flutti 1998 til Siglufjarðar en árið 2000 til Akureyrar. Foreldrar hans eru Pétur Sigurgeir Sigurðsson og Kristín Böðvarsdóttir. Föðurafi hans var kunnur málari á Ísafirði en móðurafinn starfrækti lengi rækjuverksmiðju.

Byrjaði óvenju seint að æfa
Sveinbjörn var í fótbolta og á skíðum á yngri árum en fór ekki að æfa handbolta fyrr en á 15. aldursári og einbeitti sér að honum ári síðar. „Einhverra hluta vegna fannst mér langskemmtilegast að vera í marki þegar ég og bróðir minn vorum í handbolta á ganginum heima. Því lá beinast við að fara í markið þegar ég byrjaði að æfa,“ segir hann nú.
Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson