Hvað sögðu menn eftir Valsleikinn?


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Það vantar ekki umræðuefnið eftir hörkuleiki		4. febrúar 2011 - Akureyri handboltafélag skrifar Hvað sögðu menn eftir Valsleikinn? Eins og við er að búast hafa verið fjölmörg viðtöl á helstu miðlum við leikmenn og þjálfara liðanna eftir leikinn í gær. Hér kemur samantekt á því sem við höfum fundið. Byrjum á viðtölum við heimamenn. Guðlaugur Arnarsson: Ég er allur marinn Gulli ræddi við Þröst Erni Viðarsson á Vikudegi Varnarjaxlinn í liði Akureyrar, Guðlaugur Arnarsson, fór á kostum í sigri norðanmanna gegn Val í kvöld í N1-deild karla í handbolta í Höllinni á Akureyri. Guðlaugur batt sterka vörn heimamanna saman en frábær fyrri hálfleikur lagði grunninn að 28:26 sigri norðanmanna. Hann var í leikslok réttilega valinn maður leiksins í liði Akureyrar og var sáttur með sigurinn, en þó nokkuð lemstraður. „Ég er allur marinn og að drepast í öxlinni,“ sagði Guðlaugur, enda nokkur skotin sem hann fékk í sig í kvöld. „Fyrri hálfleikurinn var mjög flottur en ég er pínu svekktur með hvernig við komum inn í seinni hálfleikinn. Það er eins og við höfum haldið að við myndum bara klára þetta á hálfum hraða. Það vantaði mikið neistann í seinni hálfleik sem var í fyrri og við vorum að fá á okkur klaufaleg mörk. Grunnurinn að sigrinum var hins vegar lagður í fyrri hálfleik þar sem allt gekk upp, góð vörn, góð sókn og mikið af hraðaupphlaupum. Við erum svolítið útaf í seinni hálfleik og þá riðlaðist spilið hjá okkur,“ sagði Guðlaugur. Hann segir það bersýnilega hafa komið í ljós í seinni hálfleik að Akureyri hefur ekki leikið marga æfingaleiki í hléinu á deildinni. „Við spiluðum tvo leiki í byrjun janúar en það er bara svona að búa út á landi. Svo erum við líka að missa menn í meiðsli,“ sagði Guðlaugur í lokin. Guðlaugur gaf ekkert eftir í leiknum Guðlaugur: Allur úti í boltaförum Hjalti Þór Hreinsson á visir.is ræddi sömuleiðis við Guðlaug eftir leikinn: Guðlaugur Arnarsson, Öxlin, var frábær í liði Akureyrar sem vann Val í N1-deild karla í kvöld. Hann varði ófá skot í vörninni og batt hana saman. Honum tókst þó ekki að skora en jafnan er haldin hátíð þegar kappinn læðir inn marki. „Við vorum fyrst eins og beljurnar á vorin en fríið kom svo í ljós í seinni hálfleik,“ sagði Guðlaugur við Vísi. „Við mættum hrokafullir inn í seinni hálfleikinn, eins asnalegt og það er, og misstum þetta niður. Það vantar kannski pínu leikæfingu, við spiluðum síðast fyrir mánuði í tveimur æfingaleikjum. En þetta á ekki að gerast.“ Guðlaugur varði fjölda skota í leiknum, líklega jafn mörg í þeim fyrri og Sveinbjörn Pétursson markmaður. „Ég er allir úti í boltaförum, úti um allt. En það er bara gott,“ sagði Guðlaugur. „Valsmenn börðust vel í seinni hálfleik. Bubbi varði vel hjá þeim en við völdum ekki alltaf rétta kosti í sókninni,“ sagði Guðlaugur og líklega má rekja það til þess hversu lítið hann fékk að spreyta sig þar. „Oddur hefur líka verið uppi í stúku í allan janúar, eitthvað að slappa af,“ sagði Gunnlaugur og hló við en Oddur var með landsliðinu á HM í Svíþjóð. „Við sýndum að við getum spilað vel en líka að við eigum fullt inni,“ sagði Húsavíkurtröllið. Hjalti ræddi einnig við Sveinbjörn Pétursson sem skartaði stuttbuxum í leiknum Sveinbjörn Pétursson: Liðugri í stuttbuxum Sveinbjörn Pétursson skartaði forláta stuttbuxum í leiknum gegn Val í N1-deildinni í kvöld. Hann bætti þar með enn á sjálfspíningarhvatarkenningar um markmenn. Sveinbjörn varði þó vel en hann segist vera sem nýr maður á nýju ári. Hinn markmaður liðsins, Stefán Guðnason, tjáði Vísi að hann tæki á sig stílbrot markmannanna, en Stefán klæddist síðbuxum eins og venjan er. „Ég vissi ekki af þessu hjá Bubba, ég tek þetta á mig og kippi þessu í liðinn næst,“ sagði Stefán sem lofaði þar með að klæðast stuttbuxum líka í næsta leik. Sveinbjörn sjálfur segir að hann sé liðugri í stuttbuxunum. „Ég er yfirleitt í stuttbuxum á æfingum svo það er ekkert nýtt, en það er annað að vera í þessu í leik. Þetta er svo létt og þægilegt. Það er nýr og breyttur Bubbi eftir áramót, ný klipping og stuttbuxur,“ sagði Sveinbjörn hress. Hann var líka ánægður með stigin tvö. „Það var haustbragur á þessum leik, en þetta var ærleg áminning fyrir liðið að það þýðir ekkert að slaka á. Vörnin var frábær í fyrri hálfleik en við slökuðum of mikið á í þeim seinni. En stigin voru góð,“ sagði Sveinbjörn sem hefur lítið æft undanfarið vegna smávægilegrar tognunar. Flott tilþrif í stuttbuxunum Andri Yrkill Valsson blaðamaður Morgunblaðsins ræddi við Odd Gretarsson. Oddur Gretarsson: Kom reynslunni ríkari heim Oddur Gretarsson, leikmaður Akureyrar, var sem kunnugt er hluti af íslenska landsliðinu á Heimsmeistaramótinu sem lauk í síðustu viku. Hann segist vera mjög ánægður með reynsluna sem svona stórmót hefur í för með sér. „Þótt það hafi ekki mætt mikið á mér á þessu móti þá er maður klárlega reynslunni ríkari. Það var vel tekið á móti mér enda er mjög góður andi í hópnum.“ Aðspurður hvort lið erlendis frá hafi ekki verið að fylgjast með honum segir hann að svo sé. „Það eru ýmis lið sem hafa sýnt áhuga en það er ekkert komið á samningastig. Maður er auðvitað spenntur fyrir því að fara út og ef eitthvað gott tilboð kemur upp þá mun ég auðvitað skoða það, en ég mun ekki stökkva á hvað sem er,“ sagði Oddur. Oddur í kunnuglegri stöðu Atli Hilmarsson: Góð tvö stig í hús Andri Yrkill ræddi sömuleiðis við Atla Hilmarsson þjálfara Akureyrar „Fyrri hálfleikurinn var hreint út sagt frábær,“ sagði Atli eftir leikinn. „Að fara inn í hálfleik með sjö marka forskot var kannski of gott til að vera satt. Í síðari hálfleik einbeittum við okkur illa í færunum og gerðum Bubba [Hlyn Morthens] aftur að heimsklassa markmanni. Hann átti ekki séns í fyrri hálfleik en varði allt í þeim síðari. Við fáum líka á okkur óþarfa mörk og það var einhvern veginn ekki sami neisti í okkur. En þetta voru tvö góð stig, við erum efstir í deildinni og ég er alveg hrikalega ánægður með fyrri hálfleikinn og það var ótrúlegt hvað allt small hjá okkur í fyrsta leik eftir langt hlé.“ Atli fylgist með gangi mála í leiknum Valsmenn fengu að sjálfsögðu sitt pláss í viðtölum eins og hér kemur fram. Sturla Ásgeirsson: Sáttur við seinni hálfleikinn Sturla Ásgeirsson hjá Val var í viðtali við Vikudag en hann átti fínan seinni hálfleik líkt og aðrir liðsfélagar hans. Hann sagði það erfitt að koma til baka á sterkum útivelli, en Valur var sjö mörkum undir í hálfleik. „Fyrri hálfleikurinn var skelfilegur af okkar hálfu og það er erfitt að vinna upp sjö mörk gegn Akureyri á heimavelli,“ sagði Sturla eftir leik. Hann var þó sáttur með seinni hálfleikinn þar sem Valsmenn rifu sig upp. „Mér fannst við sýna frábæru baráttu í seinni hálfleik og við vorum ekki langt frá þessu. Við gerðum hins vegar heimskuleg mistök á lokakaflanum og þetta var bara orðið einum of erfitt. Við vorum greinilega ekki klárir í þetta en seinni hálfleikurinn var flottur og strákarnir eiga hrós skilið fyrir það,“ sagði Sturla Ásgeirsson. Sturla komst lítt áleiðis í fyrri hálfleik Ernir Hrafn Arnarsson: Skelfileg sókn í fyrri hálfleik Eftir leik ræddi Hjalti Þór Hreinsson á visir.is við Erni Hrafn Arnarsson leikmann Vals sem var besti leikmaður liðsins í kvöld sem liðið tapaði fyrir Akureyri, 28-26 í N1-deildinni. „Það var mikilvægt augnablik í lok fyrri hálfleiks þegar við gátum minnkað muninn í þrjú mörk en töpuðum boltanum og þeir keyrðu á okkur. Þeir náðu þessu upp í sjö og það var mjög erfitt. Við héldum ekki haus til að ná þeim alveg í seinni hálfleik. Þeir náðu hraðaupphlaupunum með slakri sókn okkar í fyrri hálfleik en þetta lagaðist í þeim seinni. Þegar við náum að stilla upp vörninni þá var þetta í fínu lagi,“ sagði Ernir. Hann var einn fárra leikmanna sem fundu sig almennilega, sér í lagi fyrir utan en þeir Alex Jedic og Anton Rúnarsson voru með hörmulega skotnýtingu. „Alex þarf smá sjálfstraust, Anton hefur verið heitur undanfarið. Svona gerist bara.“ Hér tókst Erni Hrafni ekki að snúa á Akureyrarvörnina Óskar Bjarni Óskarsson, þjálfari Vals, var lítið með liðinu í janúar þar sem hann var með landsliðinu á HM í Svíþjóð. „Við söknuðum Óskars að vissu leiti í janúar, við einbeittum okkur að öðru en hann fer oft í. Það var allt í lagi eftir að hann kom heim þannig að kannski söknuðum við hans ekkert um of,“ sagði Ernir. Óskar Bjarni Óskarsson: Okkur vantaði trú á verkefnið Andri Yrkill ræddi við Óskar þjálfara Vals. „Við vissum að við mundum lenda undir til að byrja með. Við erum í meiðslavandræðum og sóknarleikurinn var því svolítið staður eins og ég bjóst við,“ sagði Óskar Bjarni Óskarsson við mbl.is eftir tap sinna manna gegn Akureyri fyrir norðan, 28:26, í úrvalsdeild karla í handknattleik í kvöld. „Við áttum samt ekki að vera sjö mörkum undir í hálfleik. Skotnýtingin var léleg og það var of mikið um ódýr mistök þar sem enginn steig upp. Við sýndum mikinn karakter í síðari hálfleik en það vantaði herslumuninn.“ Þrátt fyrir að liðið hafi átt erfitt uppdráttar fyrri hluta leiks var Óskar þó ekki ósáttur við leik sinna manna heilt yfir. „Vörnin var ágæt í fyrri hálfleik en við fengum bara á okkur of mikið af hraðaupphlaupum. Ég er þannig séð ánægður með varnarleikinn þrátt fyrir að auðvitað megi taka út nokkur atriði. Okkur vantaði bara trú á verkefnið og þú ferð ekki hingað norður ef þú ert ekki ákveðinn í að standa þig vel. Við hlupum ekki nógu hratt á þá og vorum hreint yfir ekki nógu ákveðnir í okkar aðgerðum.“ Óskar Bjarni og Heimir þjálfarar Vals
Fletta milli frétta	Til baka Senda á Facebook