Taugaspennutryllir þegar Akureyri vann Selfoss


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Mindaugas, Daði og Igor settu mark sitt á leikinn		1. desember 2016 - Akureyri handboltafélag skrifar Taugaspennutryllir þegar Akureyri vann Selfoss Það er ekki ofsögum sagt að Akureyrarliðið bjóði áhorfendum upp á háspennutrylla í hvert sinn sem það stígur inn á leikvöllinn. Á því varð heldur engin breyting í kvöld. Það heyrðist á áhorfendum fyrir leik að það yrði spennandi að sjá hvernig liðið yrði skipað ekki síst í ljósi þess að skyttan Karolis Stropus er úr leik vegna hásinaslits. Akureyri hóf leik í vörn og í hjarta varnarinnar var mættur einn unglingurinn í viðbót, Daði Jónsson í sínum fyrsta meistaraflokksleik. Í sókninni var það hins vegar varnarjaxlinn Róbert Sigurðsson sem tók skyttustöðuna vinstra megin og óhætt að segja að þeir hafi báðir skilað sínu með sóma. Akureyri var með yfirhöndina allan fyrri hálfleikinn, náðu þó ekki að hrista Selfyssinga almennilega af sér en munurinn lengst af tvö til þrjú mörk. Mindaugas var öflugur í sókninni með þrjú mörk og til viðbótar við áðurnefnda unglinga er rétt að nefna góða innkomu hjá þeim Arnóri Þorra Þorsteinssyni og Arnþóri Gylfa Finnssyni en Arnþór skoraði einmitt síðustu tvö mörk Akureyrar í hálfleiknum þar sem Akureyri leiddi 11 – 9 í hálfleik. Vörnin var traust og Tomas Olason sterkur þar á bak við með níu varin skot í hálfleiknum. Patrekur Stefánsson gaf tóninn í fyrstu sókn seinni hálfleiksins og jók muninn í þrjú mörk með flottu skoti. Liðin skiptust á að skora lengst af seinni hálfleiksins þannig að munurinn hélst áfram tvö til þrjú mörk upp í stöðuna 18 - 16. Patrekur var flottur á þessum kafla, með þrjú af þessum mörkum og fiskaði auk þess víti. Þá var komið að Igor Kopyshynskyi sem kom fyrst við sögu þegar átján mínútur voru eftir af leiknum. Þó að Igor sé að öllu jöfnu hornamaður þá sýndi hann magnaða takta á miðjunni og sá til þess að Akureyri náði fjögurra marka forystu 20 – 16 og skömmu seinna var staðan 21-17. Staðan orðin vænleg en ennþá voru fjórtán mínútur eftir af leiknum og Selfyssingar náðu vopnum sínum. Varnarleikur þeirra small og Helgi Hynsson lokaði markinu. Það var þó sérstaklega fyrir stórleik skyttunnar Elvars Arnar Jónssonar að þeim tókst að jafna leikinn í 23-23 þegar tvær mínútur voru til leiksloka. Selfyssingar fengu meira að segja tækifæri til að komast yfir en Igor komst inn í sendingu þeirra og skoraði 24. markið úr hraðaupphlaupi. Guðni Ingvarsson, línumaður Selfyssinga fékk sannkallað dauðafæri til að jafna leikinn en skaut himinhátt yfir markið. Akureyri hélt í sókn þegar 50 sekúndur voru eftir af leiknum og léku hana afar skynsamlega. Hún virtist reyndar vera að renna út í sandinn endaði með því að Mindaugas fintaði sig í gegnum Selfossvörnina og skoraði 25. markið þegar þrjár sekúndur voru eftir á klukkunni. Lokatölur leiksins 25-23 og gríðarlegur fögnuður í húsinu sem von er. Þetta var sjötti leikur liðsins í röð án taps og skilar liðinu upp í 7. sæti deildarinnar eftir að hafa setið á botninum, í 10. sæti nánast allt mótið. Mörk Akureyrar: Mindaugas Dumcius 6, Kristján Orri Jóhannsson 5 (3 úr vítum), Patrekur Stefánsson 4, Igor Kopyshynskyi 3, Arnór Þorri Þorsteinsson 2, Arnþór Gylfi Finnsson 2, Róbert Sigurðarson 2 og Andri Snær Stefánsson 1 mark. Tomas Olason var sérstaklega flottur í fyrri hálfleiknum en varði í heildina 12 skot, þar af 1 vítakast. Arnar Þór Fylkisson kom í markið á tímabili í seinni hálfleiknum. Mörk Selfoss: Elvar Örn Jónsson 10, Einar Sverrisson 5, Teitur Örn Einarsson 4 (3 úr vítum), Alexander Már Egan 3 og Guðni Ingvarsson 1 mark. Helgi Hlynsson stóð lengst af í markinu og átti sérstaklega góðan seinni hálfleik en í heild varði hann 12 skot. Einar Ólafur Vilmundarson fékk tækifæri í markinu og varði eitt skot. Í lok leiks var Mindaugas valinn maður Akureyrarliðsins en hjá Selfyssingum var Einar Sverrisson valinn. Trúlega áttu flestir von á að Elvar Örn Jónsson fengi nafnbótina en hann átti sannkallaðan stórleik með 10 mörk og réði Akureyrarliðið ekkert við hann. Leikurinn var í beinni útsendingu á Akureyri TV og er hægt að horfa á hann með því að smella hér. Nú fá menn örstutta hvíld en þó ekki nema fram á mánudagskvöldið en þá tekur Akureyri á móti FH í sextán liða úrslitum Coca Cola bikarsins. Sá leikur hefst klukkan 19:00 í KA heimilinu og þar er að sjálfsögðu leikið til þrautar, sigurvegarinn fer í átta liða úrslitin en tapliðið er úr leik.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson