Viðtöl eftir leik Akureyrar og Fram


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Sverre og Andri Snær mættu í viðtöl eftir leikinn		19. desember 2016 - Akureyri handboltafélag skrifar Viðtöl eftir leik Akureyrar og Fram Að venju leitum við uppi fjölmiðlaviðtöl við leikmenn og þjálfara liðanna eftir leik. Hér fylgja viðtöl af mbl.is og visir.is. Byrjum á Einari Sigtryggssyni, blaðamanni mbl sem ræddi við leikmennina Andra Snæ Stefánsson og Arnar Birki Hálfdánarson. Andri Snær: Þeir rassskelltu okkur Fyrirliði Akureyringa, Andri Snær Stefánsson, var ekki beint kominn í veisluskap þegar blaðamaður náði í skottið á honum í dag. Þá var nýlokið leik Akureyrar og Fram í Olís-deild karla, leik sem Framarar áttu frá byrjun en honum lauk með öruggum sigri Safamýrarpilta, 34:25. Voru leikmenn Akureyringa á leið í jólagleði og fannst þeim, sem á leikinn horfðu, eins og leikmenn væru bara komnir í jólafrí með kúfaðan disk af góðgjörðum innan seilingar. Var það málið? „Nei. En það er samt alveg ljóst að við vorum ekki tilbúnir í neinn slag í dag. Að lenda 1:7 undir segir bara allt sem segja þarf. Við vorum ekki líklegir til að sækja á markið. Við eigum eitt skot á markið fyrstu tíu mínúturnar. Þetta sýnir hreinlega að við vorum engan veginn tilbúnir í það sem þurfti að gera. Framarar eru með sprækt og vel spilandi lið og þeir voru bara miklu betri en við og rassskelltu okkur bara. Þeir höfðu lítið fyrir mörkunum sínum og það var allt svo einfalt hjá þeim. Langskot og línuspil. Við komum varla við þá og þeir spiluðu inn á það, mjög vel. Í dag vorum við sem einstaklingar í stað þess að spila eins og heild.“ Andri Snær átti tvö stangarskot í leiknum gegn Fram Það verður þó að minnast á að það féll ekkert með ykkur. Fimm stangarskot, dauðafæri í vaskinn og skringilegar brottvísanir. Það var allt á móti ykkur. „Já, já. Þetta helst allt í hendur. Hins vegar þarf að leggja extra mikið á sig til að fá þessa hluti með sér. Við áttum bara ekkert skilið miðað við okkar frammistöðu í dag. Það er óskaplega einfalt. Það er bara skrýtið að við höfum bara verið fimm mörkum undir í hálfleik, miðað við hvað við vorum lélegir. Í heild sinni var þetta bara virkilega vond frammistaða hjá okkur og ekkert í takt við það sem við ætluðum,“ sagði Andri Snær en vonandi stendur steikin ekki á liðsmönnum þegar veislan hefst seinna í kvöld. Arnar Birkir: Veisla í Framrútunni Arnar Birkir Hálfdánarson skoraði tíu mörk í dag þegar lið hans, Fram, tætti Akureyringa í sig í lokaleik Olís-deildarinnar í handbolta á þessu ári. Fram byrjaði leikinn 7:1 og eftir það réðu þeir ferðinni og unnu sannfærandi sigur, 34:25. Arnar Birkir var sérlega skæður í byrjun og raðaði inn mörkum, nánast án fyrirhafnar. Það þótti við hæfi að draga Arnar frá fagnandi liðsfélögum og leyndi sér ekki að stráksi var glimrandi hress. Þið þurftuð ekki að hafa mikið fyrir þessum sigri. „Þetta var fyrst og fremst baráttusigur hjá okkur. Kannski má nota orðið varnarsigur þar sem við vorum þéttir og gerðum þeim lífið leitt. Við byrjuðum vel og hleyptum þeim aldrei inn í leikinn. Við vorum bara tilbúnir. Við lögðum af stað klukkan sjö í morgun og fórum svo í mat á Greifanum um leið og við komum norður. Eftir að við vorum búnir að borða þá bara byrjaði þetta. Þá byrjaði geðveikin. Það er gott að vera ekki á botninum um jólin og við vorum ákveðnir í að gera úr þessu alvöru ferð. Nú verður blásið til veislu á heimleiðinni. Það verður virkilega gaman á leiðinni heim, kannski verður boðið upp á mjólk.“ Þér gekk vel að skora og þú byrjaðir leikinn virkilega vel, raðaðir inn keimlíkum mörkum með því að skjóta af gólfinu. Var þetta eins auðvelt og það leit út fyrir að vera? „Það var nú ekki þannig. Ég þurfti að hafa aðeins fyrir þessu en skotin gengu og ég hélt bara áfram, setti hann alltaf hægra megin.“ Nú eruð þið búnir að vinna tvo sannfærandi sigra í röð eftir langan og magran tíma. Þurfti eitthvað sálfræðitrix til að snúa genginu við? „Nei það þurfti ekkert slíkt. Við erum allir svo ungir að við myndum ekkert lagast við svoleiðis. Þetta byggist bara á greddu og brjálæði. Síðustu leikir eru bara eins og í byrjun móts þar sem við mættum sterkir til leiks. Við vitum alveg hvað við getum og höfum náð því fram á ný“ sagði Arnar Birkir eldhress og efast blaðamaður ekki um að það verði alvöru veisla í Framrútunni á leið til Reykjavíkur í kvöld. Þá víkur sögunni að viðtölum Arnars Geirs Halldórssonar við þjálfara liðanna en þau birtust á visir.is Sverre: Gerðum eitthvað kolvitlaust í undirbúningnum Sverre Jakobsson, þjálfari Akureyrar, var að vonum þungur á brún eftir að hafa horft upp á sitt lið mæta seint og illa til leiks. Hann vildi ekki skella skuldinni alfarið á leikmenn liðsins og segir þjálfarateymið líka þurfa að líta í eigin barm. „Þetta eru gífurleg vonbrigði. Ekki endilega úrslitin heldur hvernig við spiluðum þennan leik. Þetta snerist um að fara í stríð og við fórum í rauninni aldrei í þá orrustu. Að sjálfsögðu er óþolandi að sjá liðið mæta svona til leiks. Mér fannst Framararnir ákveðnari og betri á öllum sviðum handboltans til að byrja með. Þá þurftum við að fara að elta og við vorum bara of langt á eftir þeim á of mörgum sviðum. Það er ekki bara leikmannanna heldur þurfum við þjálfararnir líka að taka þetta á okkur. Við höfum gert eitthvað kolvitlaust í undirbúningnum,“ segir Sverre. Hann segir það ekki vera neitt sérstaklega svekkjandi að tapa síðasta leik fyrir hlé. Það sé alltaf svekkjandi að tapa. Hann er engu að síður jákvæður fyrir framhaldinu. „Það eru ekki margar vikur síðan við vorum mörgum stigum og langt á eftir hinum liðunum. Við erum allavega komnir í smá pakka og höfum blásið í okkur lífi aftur. Það er það jákvæða og strákarnir munu alltaf fá hrós fyrir það. Það fór gífurleg vinna í það. Nú vitum við bara hver staðan er. Það er bikarleikur eftir bikarleik í hverri einustu umferð og við þurfum að nýta tímann gríðarlega vel. Við horfum bjartir á framhaldið og þetta sýnir okkur að það þarf að vera mjög góður undirbúningur, andlega og líkamlega, fyrir hvern leik ef við ætlum að fá eitthvað út úr leikjunum,“ segir Sverre. Sverre í alvarlegum viðræðum á hliðarlínunni Akureyringar hófu tímabilið virkilega illa og voru langneðstir um tíma. Liðinu hefur tekist að fikra sig upp töfluna á undanförnum vikum, þrátt fyrir mikil meiðslavandræði. Akureyri fer engu að síður í jólafríið í næstneðsta sæti deildarinnar. „Maður vill alltaf vera sem hæst en miðað við hvernig staðan var og öll áföllin sem hafa dunið á okkur þá er ég að mörgu leyti sáttur við að vera ekki lengra frá hinum liðunum. Þetta er ekki búinn að vera eðlilegur vetur. Við erum með bakið upp við vegg, eins og nokkur önnur lið, og menn þurfa að vera mjög andlega sterkir í þeirri baráttu. Það verður bara gaman og við höfum janúar til að vinna í okkar málum og hugsanlega fáum við fleiri menn inn í liðið okkar sem væri líka mjög jákvætt.“ Er Sverre að ýja að því að Akureyri leiti á leikmannamarkaðinn þegar félagaskiptaglugginn opnar? „Ég veit það ekki. Ég er aðallega að vonast eftir því að við fáum eitthvað af þeim mönnum sem við eigum inni, þeir sem eru meiddir. Þá kæmi aukin samkeppni um stöður og meiri breidd. Hvort við þurfum að fá nýja leikmenn veit ég ekki. Við höfum trú á okkar strákum en við gerum það sem við þurfum að gera,“ segir Sverre að lokum. Guðmundur: Æðislegt að fara með sigur inn í hléið Guðmundur Helgi Pálsson, þjálfari Fram, var í skýjunum með frammistöðu sinna manna í dag og hrósaði liðinu í hástert. „Þetta var frábær leikur, allt frá fyrstu mínútu. Strákarnir komu tilbúnir til leiks og þegar þeir standa svona saman er hægt að gera góða hluti. Við erum búnir að vera að ná stemningunni til baka hægt og rólega. Þegar hún næst, eins og hún gerði gegn Haukum og Val og svo núna þá er erfitt að eiga við okkur.“ Nú tekur við jólafrí og svo landsleikjahlé en næsti leikur Olís-deildarinnar er í byrjun febrúar. Hversu mikilvægt var að vinna síðasta leikinn fyrir hlé? „Það er æðislegt að fara með sigur inn í svona hlé. Það er hundleiðinlegt að fara með tap á bakinu í þetta langt hlé. Fyrir hópinn og okkur sem erum í kringum þetta er frábært að fá sigur og það gerir mikið fyrir andlega þáttinn,“ Framarar hafa verið upp og niður í vetur en eru með þrettán stig í sjöunda sæti. Guðmundur kveðst nokkuð sáttur með veturinn hingað til. „Ég er alveg sáttur. Ég hefði viljað vera með svona tveim stigum meira. Bæði ÍBV leikurinn og tveir leikir á móti Gróttu sem ég hefði viljað fá allavega stig út úr. Annars er ég bara sáttur,“ segir Guðmundur sem útilokar ekki að Framarar muni styrkja liðið þegar opnað verður fyrir félagaskipti. „Aldrei að vita. Ég bara veit það ekki. Ég þarf þess ekkert en það er alltaf gaman að breikka hópinn“.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson

Viðtöl eftir leik Akureyrar og Fram

Andri Snær: Þeir rassskelltu okkur

Arnar Birkir: Veisla í Framrútunni

Sverre: Gerðum eitthvað kolvitlaust í undirbúningnum

Guðmundur: Æðislegt að fara með sigur inn í hléið