Warning: Undefined array key "frettanr" in /web/akhandadmin/public_html/index.php on line 15
Háspennujafntefli Akureyrar og ÍBV - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan




Ljósmyndir frá leiknum     Myndband frá leiknum      Tölfræði leiksins 
    Akureyri - ÍBV  24-24 (12-13)
Olís deild karla
KA heimilið
Sun. 20. nóv. 2016 klukkan: 14:00
Dómarar: Ramunas Mikalonis og Þorleifur Árni Björnsson
Umfjöllun

Kristján Orri er heldur betur kominn á flug, Tomas og Igor með flottan leik





20. nóvember 2016 - Akureyri handboltafélag skrifar

Háspennujafntefli Akureyrar og ÍBV

Það var gríðarleg spenna og stemmingin eftir því í KA heimilinu í dag þegar Akureyri og ÍBV mættust í Olís deild karla. Gestirnir byrjuðu betur í leiknum og náðu fjögurra marka forskoti 2-6 á fyrstu tíu mínútunum. Sóknarleikur heimamanna gekk brösuglega og mönnum mislagðar hendur við að koma boltanum á milli sín.

En hægt og bítandi tókst að vinna upp forskot Eyjamanna og eftir rúmar 25 mínútur jafnaði Kristján Orri leikinn í 11-11 þegar hann skoraði þrjú mörk í röð. Eyjamenn náðu forystunni aftur og leiddu 12-13 í hálfleik.

Kristján Orri og Karolis Stropus fóru fyrir sóknarleiknum í fyrri hálfleik en þeir tveir skoruðu tíu af tólf mörkum liðsins, Kristján Orri 6 og Stropus 4.


Karolis Stropus með flott mark, eitt af fimm í leiknum

Seinni hálfleikurinn var síðan samfellt taugastríð, Kristján Orri hélt áfram þar sem frá var horfið og með þrem mörkum kom hann Akureyri yfir í 15-14. Þar með var Akureyri komið með frumkvæðið í leiknum án þess þó að ná að hrista ÍBV af sér.

Úkraínski hornamaðurinn Igor Kopyshynskyi leysti Andra Snæ af í horninu en raunar var tvísýnt um að Andri gæti yfirleitt tekið þátt í leiknum. Igor kom þarna inn á í sínum fyrsta leik og sýndi að hann er frábær leikmaður, þrjú stórgóð mörk úr horninu.

Akureyri náði tveggja marka forskoti, 22-20 og aftur 23-21 en ÍBV náði í bæði skiptin að jafna leikinn. Lokaspretturinn tók á taugarnar, Igor skoraði 24. mark Akureyrar en Sigurbergur Sveinsson jafnaði. Karolis Stropus reyndi að gera út um leikinn með hörkuskoti sem því miður hafnaði í þverslánni þannig að ÍBV fékk boltann þegar 8 sekúndur voru eftir. ÍBV geystist í sókn og þeirra langbesti maður, Theodór Sigurbjörnsson kom skoti í markið en Tomas Olason innsiglaði frábæran leik sinn með því að verja skotið og jafntefli því niðurstaðan.


Tomas Olason með glæsivörslu frá Theodóri í hraðaupphlaupi

Mörk Akureyrar: Kristján Orri Jóhannsson 13 (3 úr vítum), Karolis Stropus 5, Igor Kopyshynskyi 3, Arnór Þorri Þorsteinsson 1, Garðar Már Jónsson 1 og Mindaugas Dumcius 1.
Í markinu átti Tomas Olason enn einn stórleikinn, varði 22 skot þar af 1 vítakast. Arnar Þór Fylkisson reyndi við eitt vítakast en gekk ekki að þessu sinni.

Mörk ÍBV: Theodór Sigurbjörnsson 12 (7 úr vítum), Sigurbergur Sveinsson 4, Ágúst Emil Grétarsson 2, Dagur Arnarsson 2, Elliði Snær Viðarsson 1, Grétar Þór Eyþórsson 1, Kári Kristján Kristjánsson og Magnús Stefánsson 1.
Í markinu stóð Kolbeinn Aron Ingibjargarson og varði 14 skot, Andri Ísak Sigfússon kom inná og varði vítakast.

Kristján Orri Jóhannsson átti hreinlega stórleik, skoraði 13 mörk úr 14 skotum. Skotið sem klikkaði var vítakast en hann náði sjálfur frákastinu og skoraði í kjölfarið.


Eitt af þrettán mörkum Kristjáns Orra í uppsiglingu

Tomas Olason var sömuleiðis með frábæran leik í dag og varði mikið af dauðafærum Eyjamanna. Karolis Stropus var frábær í fyrri hálfleiknum og hornamaðurinn Igor sýndi að hann kann sitthvað fyrir sér.

Hjá Eyjamönnum var Theodór Sigurbjörnsson allt í öllu, stal ótal boltum í vörninni sem skiluðu ódýrum hraðaupphlaupsmörkum.

Leikurinn var í beinni útsendingu á Akureyri TV, smelltu hér til að horfa á útsendinguna.

Næsti leikur Akureyrar er sunnudaginn 27. nóvember þegar liðið sækir topplið Aftureldingar heim.

Tengdar fréttir

Róbert, Sverre og Kristján Orri í viðtölum





21. nóvember 2016 - Akureyri handboltafélag skrifar

Viðtöl eftir ÍBV leikinn

Eftir að menn höfðu aðeins náð að draga andann eftir leik Akureyrar og ÍBV í gærkvöldi ræddu blaðamenn mbl.is, visir.is og ruv.is við leikmenn og þjálfara liðanna. Einar Sigtryggsson blaðamaður mbl ræddi við varnarjaxl Akureyrar, Róbert Sigurðarson og Arnar Pétursson, þjálfara ÍBV.

Róbert: Leyfðu okkur að djöflast

Það er ekki oft sem varnarmenn í handboltanum fá athygli. Róbert Sigurðarson, í liði Akureyrar, fór hreinlega á kostum í vörn liðsins í dag þegar Akureyri og ÍBV mættust í Olís-deild karla.
Annars voru það liðsfélagar hans, þeir Kristján Orri Jóhannsson og Tomas Olason sem voru í aðalhlutverki. Kristján Orri skoraði 13 mörk og Tomas Olason varði 22 skot. Róbert steig ekki feilspor í leiknum og Eyjamenn steyttu oft á honum. Róbert var gripinn í viðtal eftir leik.


Róbert með góðar gætur á Kára Kristjáni í leiknum

„Ég verð að vera sáttur með þetta stig en maður vill alltaf fá meira út úr þessum leikjum. Við spiluðum góða vörn og það skiptir mig miklu máli. Þetta var dálítið harður leikur og dómararnir leyfðu óvenjumikið þannig að það hentaði okkur ágætlega. Þetta var verðskuldað stig og við unnum sannarlega fyrir því. Við byrjuðum frekar illa og þurftum mikið átak til að komast aftur inn í leikinn. Við hertum okkur svo í seinni hálfleik, spiluðum agaðri sóknir og betri varnarleik.“

Nú hékk Róbert inni á vellinum allan tímann en fyrir leik var hann búinn að yfirgefa völlinn með rautt spjald fimm sinnum í vetur.
„Það gekk vel í dag. Ég reyndar fékk brottvísun á mig fyrir ólöglega skiptingu. Maður náttúrulega dansar á línunni og reynir að passa sig en dómararnir leyfðu okkur að djöflast í hver öðrum og það er bara miklu skemmtilegra þannig. Maður verður að vera fastur fyrir en passa að vera ekki grófur.“

Nú er liðið búið að spila fjóra leiki í röð án taps. Er andinn betri en áður?
„Þrátt fyrir að við höfum verið að tapa leikjum í byrjun þá var alltaf góður andi hjá okkur. Við vissum að það byggi meira í liðinu og héldum bara okkar striki. Nú erum við að fá það sem við eigum skilið. Við erum að spila betur og agaðri leik. Næsti leikur er gegn Aftureldingu og við mætum á fullu gasi gegn þeim. Það geta allir unnið alla í þessari deild,“ sagði Róbert að lokum.

Arnar: Lít kannski út eins og hálfviti á hliðarlínunni

Arnar Pétursson, þjálfari Eyjamanna, var líflegur á hliðarlínunni í dag þegar lið hans spilaði gegn Akureyringum í Olís-deild karla. Var hann eins og sjöundi varnarmaður liðsins á meðan hann hreyfði sig og öskraði á sína menn. Leikurinn var mjög spennandi og lauk honum með jafntefli 24:24. Arnar kom í viðtal eftir leik.

„Þetta var eins og alltaf þegar við mætum Akureyringum, spenna í lokin. Það er alveg sama hvernig leikurinn spilast fram á 45. mínútu. Það er alltaf æsingur og læti á lokakaflanum og jafnt. Ég get ekki verið annað en sáttur með stigið úr því sem komið var. Við reyndar fengum lokasóknina og náðum að búa til skotfæri fyrir okkar heitasta mann. Tomas Olason varði bara skotið. Hann var frábær í markinu hjá Akureyri. Mér fannt við spila leikinn vel, svona lengstum. Við vorum að gera margt vel, bæði í vörn og sókn og ég er ánægður með margt. Við komum þeim oft í vandræði með góðum varnarleik okkar en töpuðum stundum hausnum og settum sjálfa okkur þannig í vandræði,“ sagði Arnar.


Arnar Pétursson þjálfari ÍBV fór mikinn á hliðarlínunni

En aðeins að honum sjálfum. Hann var mjög líflegur á hliðarlínunni og spilaði nánast vörnina með sínum mönnum.
„Stundum kemur upp í manni gamli geðsjúklingurinn og maður gleymir sér aðeins. Maður spilar þetta með þeim. Maður reynir að spara þetta en stundum gleymir maður sér og lítur kannski út eins og hálfviti á hliðarlínunni.“

Ekki gat undirritaður tekið undir neitt slíkt. Það var hreinlega frábært að sjá hvað taktarnir hjá þjálfaranum gerðu mikið fyrir varnarleikinn. Það var helst að leikmennirnir yrðu full ákafir og fengu á sig brottvísanir fyrir vikið. En þá að liðinu. Er það ekki að smella betur saman eftir brösótt gengi upp á síðkastið?
„Við fengum erfiðan októbermánuð og eitthvað fram í nóvember. Mér finnst núna að við séum hægt og rólega að koma til baka. Það verður ágætt að fá hlé á mótið. Við erum í brasi með leikmenn. Menn eru svona inn og út vegna meiðsla en á móti kemur að við gefum yngri leikmönnum spiltíma og það mun koma sér vel þegar líður á mótið. Við gerum bara það besta út því sem við höfum og tökum einn leik í einu. Ég er að vonast til þess að hafa fullmannað lið eftir áramótin,“ sagði Arnar að lokum.

Þá víkur sögunni að viðtölum Ólafs Hauks Tómassonar sem birtust á visir.is en Ólafur ræddi ítarlega við þjálfarana, Sverre Andreas Jakobsson og Arnar Pétursson.

Sverre: Stoltur af liðinu og af strákunum

„Við hefðum getað misst leikinn í lokinn því þeir áttu síðasta sénsinn en ég er ánægður,“ sagði Sverre Jakobsson, þjálfari Akureyrar eftir leik.

„Ég er ánægður með vinnuframlagið, það var enginn sem fór út af sporinu og gaf ekki allt sem þeir áttu í þetta. Ég er stoltur af liðinu og stoltur af strákunum, þeir sýndu ótrúlegan karakter og frábær liðsheild. Skotið frá Stropus þarna í lokinn var bylmingsfast og hefði alveg getað endað í netinu, þetta voru bara millímetrar“.

Það er ekki langt síðan staðan hjá Akureyri þótti mjög slæm og liðið langneðst á töflunni og í miklu basli en í síðustu leikjum hefur liðið komist á fínt skrið og er komið í alvöru baráttu aftur. Sigur í kvöld hefði getað hugsanlega komið liðinu úr botnsætinu en það tókst ekki. Sverre er þó mjög ánægður með viðbrögð og hugarfar sinna manna á þessum erfiðu tímum.

„Við þurftum að hafa mikið fyrir því að hafa fyrir því að koma okkur í jákvæðnina aftur. Ég hef sagt það áður að ég var ekki óánægður með liðið þannig séð og allir hafa reynt, gefið allt sitt og barist en stundum bara datt þetta ekki hjá okkur. Strákarnir eru tilbúnir að gefa þetta aukalega sem vantar í sínum leik og ég er afskaplega stoltur í dag. Við þurfum að núllstilla okkur, við horfum ekki á töfluna heldur bara á næsta leik.


Sverre og Ingimundur íhuga lokasókn Akureyrar í leiknum

Ég hef sagt fallegt um hann áður og get ekki sagt of mikið fallegt um hann,“ segir Sverre og glottir við tönn þegar hann er spurður út í Kristján Orra, hornamann Akureyrar sem átti stórleik í kvöld og fylgdi eftir ellefu marka leik gegn Gróttu með þrettán mörkum í dag.

„Nei, nei hann er tilbúinn að taka af skarið og á að taka af skarið, hann er orðinn það þroskaður leikmaður og mikilvægur okkar liði í varnar- og sóknarleik. Ég sagði það að hann er draumaleikmaður að þjálfa og hann er að taka stór skref í þroska og taka framförum í það sem vantaði upp á.“

Stór hluti af framförum Akureyrar síðustu vikur hefur verið markvarslan og hefur Tomas Olason spilað mjög vel í síðustu leikjum og verið Akureyringum mjög mikilvægur. Hann hefur lagt mikið að sér að sögn Sverres og vill hann meina að það séu tveir aðrir mikilvægir þættir sem hafa áhrif á framfarir Tomasar.
„Markvarslan er komin núna. Það var erfitt til að byrja með. Mér fannst hann eiga mikið inni í upphafi móts og hann tók sig á, sem og Arnar Fylkis. Það má ekki gleyma honum. Þeir vinna vel og mikið saman og án Arnars væri Tomas ekki að gera þetta. Það er ótrúlega gaman að fylgjast með þeim báðum. Þeir vinna gífurlega vel og gamla kempan Bjössi Slanga [Björn Björnsson] hefur verið að vinna með þeim í tvo mánuð og það er að skila miklu, svo hann á smá í þessu líka.“

Sverre segist ánægður með stigið þó svo liðinu hafi kannski á einhvern hátt mistekist að knýja fram sigur og hrósar leikmönnum sínum í hástert.
„Ég fagna liðsheildinni minni og strákunum. Ber mikla virðingu fyrir því sem þeir eru að leggja í púkk hérna og eiga mikið hrós skilið fyrir það sem þeir hafa gert hér í dag. Ég fagna stiginu og viljanum í þeim,“ sagði Sverre.

Arnar: Misstum hausinn um tíma en náðum að núllstilla okkur

„Ég hefði viljað stela þessu í lokinn en Tomas var góður í markinu hjá þeim og hélt þessu stigi. Þetta var hörkuleikur eins og aftur þegar við mætum Akureyri, það er ótrúlegt þegar þessi tvö landsbyggðarlið mætast þá verða þetta alltaf hörkuleikir,“ sagði Arnar Pétursson, þjálfari ÍBV eftir jafnteflið við Akureyri í dag.

Liðin skiptust á því að leiða í leiknum og Eyjamenn byrjuðu betur og höfðu yfirhöndina í fyrri hálfleiknum en náðu ekki að spila Akureyri úr leiknum. Arnar var sáttur með sitt lið en fannst hans menn klikka á einum stórum hlut í leiknum en var sáttur með viðbrögðin.
„Við stóðum okkur heilt yfir vel og vorum á tímabili að tapa okkur á spennustiginu og láta hluti fara í taugarnar á okkur og á meðan svo er þá erum við í vandræðum en þegar við náðum að núllstilla okkur og koma okkur á rétt spennustig þá var ég sáttur með ykkur.“

Deildin er mjög jöfn og þétt og ekki langt bil á milli ÍBV sem er með tólf stig eftir leikinn og Akureyrar sem er með átta stig á botninum, tvö stig hefðu því verið kærkomin fyrir Eyjamenn en Arnar ætlar ekki að gráta tapað stig heldur fagna einu.
„Það er mikilvægt, einnig bara upp á hugarfarið fyrir þetta frí sem við erum að fara í. Það hefst svo bara annað mót eftir áramót og þessir punktar fyrir áramót skipta miklu máli fyrir hausinn á manni og eru mikilvægir. Það er gríðarlega mikilvægt að ná punkti, við fögnum því á leiðinni heim þó við höfum verið svekktir með þetta núna. Akureyri er með alveg hörkulið, þeir spila mjög góða vörn og Tomas er að koma sterkur í markið hjá þeim. Það er erfitt að mæta þeim,“ sagði Arnar

Sverre Jakobsson, þjálfari Akureyrar nefndi þá Kristján Orra Jóhannsson og Theodór Sigurbjörnsson sem tvo verðandi landsliðsmenn en hægri hornamennirnir voru báðir frábærir í dag og báru uppi sóknarleik beggja liðanna. Arnar segist mjög sammála því sem Sverre sagði um þessa leikmenn.
„Já, þeir geta báðir náð langt og geta vel barist um þessa stöðu og þó það væri í skyttunni líka. Þetta eru tveir frábærir handboltamenn og sýndu okkur það vel í dag af hverju Sverre sagði þetta og var bara hárrétt hjá honum. Þeir geta vel barist um þessa stöðu og eflaust einhverjir fleiri líka,“ sagði Arnar.

Umfjöllun RÚV um leikinn og viðtöl við Kristján Orra og Magnús Stefánsson



Tveir leikir í KA heimilinu í dag



20. nóvember 2016 - Akureyri handboltafélag skrifar

Leikir dagsins í beinni útsendingu

Það verður fjör í KA heimilinu í dag þar sem við fáum tvo handboltaleiki. Klukkan 14:00 hefst leikur Akureyrar og ÍBV í Olísdeild karla. Að honum loknum, eða klukkan 16:00 er komið að leik KA/Þór og FH í 1. deild kvenna.

Við verðum með beinar útsendingar frá báðum leikjunum sem hefjast skömmu fyrir upphaf leikjanna.

Smelltu hér til að fylgjast með leik Akureyrar og ÍBV.

Og smelltu hér til að fylgjast með leik KA/Þór og FH.


Leikir liðanna hafa verið ávísun á spennutrylli

18. nóvember 2016 - Akureyri handboltafélag skrifar

Heimaleikur gegn ÍBV á sunnudaginn

Áfram heldur handboltafjörið, nú er komið að meistaraflokki Akureyrar að berjast við Vestmannaeyinga sem mæta norður yfir heiðar á sunnudaginn. Ef allt fer sem áætlað er þá verður flautað til leiks klukkan 14:00 í KA heimilinu.

Akureyrarliðið hefur heldur betur tekið sig á í stigasöfnuninni í síðustu leikjum og hefur náð í fimm stig af sex sem í boði hafa verið í þrem síðustu leikjum og nú ætla strákarnir að halda áfram á sömu braut.

Liðin mættust í rosalegum leik í Vestmannaeyjum þann 18. september þar sem Eyjamenn voru ljónheppnir og fóru með eins marks sigur, 25-24 eftir hádramatískar lokasekúndur.

Í augnablikinu er ÍBV í 6. sæti deildarinnar með 11 stig á móti 7 stigum Akureyrar. ÍBV vann átta marka heimasigur á Fram í síðustu umferð, 37-29 en höfðu tapað næstu fjórum leikjum þar á undan.

Hornamaðurinn og skyttan Theodór Sigurbjörnsson hefur farið hamförum með Eyjaliðinu á tímabilinu, skorað 106 mörk í 11 leikjum eða tæplega 10 mörk að meðaltali í leik. Skyttan Sigurbergur Sveinsson, fyrrum Haukamaður kom til liðs við ÍBV í sumar eftir dvöl erlendis og er næst markahæstur með 69 mörk. Þeir Theodór og Sigurbergur skera sig nokkuð úr en næstir eru skyttan Agnar Smári Jónsson með 34, línumaðurinn Kári Kristján Kristjánsson með 29 og hornamaðurinn Grétar Þór Eyþórsson með 24.

Markvörðurinn snjalli, Stephan Nielsen lék með ÍBV fyrstu þrjár umferðirnar en fluttist síðan í atvinnumennsku í Frakklandi. Síðasti leikur hans með ÍBV var einmitt fyrrnefndur leikur gegn Akureyri. Aðalmarkvörður ÍBV er hinn gamalreyndi Kolbeinn Aron Ingibjargarson og með honum leikur ungur og bráðefnilegur piltur, Andri Ísak Sigfússon.

Ekki má gleyma Magnúsi Stefánssyni, fyrrum leikmanni Akureyrar sem hefur verið lykilmaður í liði ÍBV undanfarin ár.


Magnús í baráttu með Akureyri gegn ÍBV 3. maí árið 2008

Þjálfari Eyjamanna er líkt og áður Arnar Pétursson og honum til aðstoðar er Sigurður Bragason.

Liðin mættust þrisvar í fyrravetur og þar var sannkölluð háspenna, fyrstu tveim leikjunum lauk með jafntefli 21-21 í Eyjum, 25-25 hér fyrir norðan en ÍBV vann eins marks sigur, 26-27 í þriðja og síðasta leiknum.


Það er óhætt að segja að það hafi verið heitt í kolunum í leik liðanna í fyrra.

Það eru því allar líkur á að við fáum rafmagnaða spennu og dramatík á sunnudaginn, þetta er svo sannarlega leikur sem enginn má missa af. Eins og áður segir þá hefst leikurinn klukkan 14:00 og nú er um að gera að mæta í KA heimilið og styðja strákana til sigurs.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson