Stjörnur í KA-Heimilinu í gær

Hún var óvenjuleg æfingin í KA-Heimilinu í gær. Mættir voru mjög margir fyrrum leikmenn KA og Þórs í gegnum tíðina og voru þeir með á æfingunni. Arnór Atlason, Árni Þór Sigtryggsson, Jónatan Magnússon, Baldvin Þorsteinsson, Arnór Gunnarsson, Einar Logi Friðjónsson, Árni Björn Þórarinsson, Björn Björnsson og Ragnar Snær Njálsson mættu. Til að byrja með léku allir Akureyringarnir ásamt nokkrum leikmönnum Akureyrar liðsins í svokölluðu Stjörnuliði gegn 2. flokki Akureyrar. Leikið var í 2x20 mínútur.

Leikurinn var gríðarlega hraður og spennandi. Eftir að jafnt hafði verið fyrstu mínútur leiksins þá náði stjörnuliðið frábærum kafla og komst í 6-12. 2. flokkur náði að koma sér aftur inn í leikinn og jafnaði í 15-15 en stjörnuliðið skoraði síðasta mark hálfleiksins og staðan 15-16 í hálfleik. 2. flokkurinn hóf síðari hálfleikinn ákaflega vel og komst í 22-19, þá kviknaði aftur líf í stjörnunum og leikurinn jafnaðist. Þegar hálf mínúta var eftir leiddi stjörnuliðið 30-31 en með marki á lokasekúndunum jafnaði 2. flokkur og 31-31 jafntefli því niðurstaðan. Afar lítið var um varnir og tilþrifin sóknarlega oft ansi skemmtileg. Dómari leiksins var Halldór Jóhann Sigfússon og dæmdi hann leikinn ákaflega vel.

Því næst var kosið í lið úr þeim leikmönnum sem mynduðu Stjörnuliðið ógurlega. Öllu meiri kraftur var kominn þá í flesta leikmenn liðsins og sóknirnar orðnar enn betri og flottari. Leik Stjörnuliðanna tveggja lauk svo með jafntefli eftir að Arnór Atlason jafnaði úr vítakasti eftir að venjulegum leiktíma var lokið.

Hér koma svo myndir frá æfingunni sem var afar skemmtileg og ekki leiðinlegt að sjá alla þessa Akureyringa komna heim aftur að leika handknattleik. Maður sá það kannski best í dag hve marga góða handboltamenn bærinn hefur alið þrátt fyrir að ansi marga hafi vantað á þessa æfingu.