Handboltamenn í Háskólanum á Akureyri - Arnór Atlason

Síðustu fréttir hér á síðunni hafa fjallað um þá leikmenn Akureyrar Handboltafélags sem jafnframt stunda nám við Háskólann á Akureyri. Í dag verður kynntur til leiks enn einn nemandinn við skólann sem jafnframt er á fullu í handboltanum. Það er enginn annar en einn af okkar mönnum í útlandinu þ.e.a.s. Arnór Atlason.

Já landsliðsmaðurinn Arnór Atlason, leikmaður FCK í Danmörku leggur stund á fjarnám í viðskiptafræði við Háskólann á Akureyri og hefur gert það allt síðan haustið 2005 þegar hann fór frá KA og hélt í handboltavíking til Þýskalands.

En hvernig fer fjarnám í viðskiptafræði fram?
Námsefni og öðrum samskiptum við nemendur er fyrst og fremst miðlað um vefinn þar sem skólinn styðst við kennsluumhverfið WebCT auk þess sem notast er við myndfundi. Til viðbótar geta fjarnemar fylgst með upptökum úr fyrirlestrum staðarnema, fengið glærur þar sem kennarinn talar um efnið. Þær aðferðir eru notaðar sem henta hverju sinni og taka þær mið af búnaði og tækni á hverjum tíma.

Fjarfundir fara fram utan venjulegs vinnutíma, þ.e. á virkum dögum eftir kl. 17:00 og á laugardögum. Önnur miðlun er að mestu óháð stund og stað. Þannig er mögulegt að svara eftirspurn eftir námi í viðskiptafræði frá fólki sem vill eða þarf að vinna með náminu.

Það er því greinilegt að nemendur Háskólans á Akureyrar geta stillt upp feykiöflugu handboltaliði, við höfum hér nefnt þau Andra Snæ, Arnór Atlason, Einar Loga, Magnús Stefánsson og Þórsteinu. Síðan þyrfti bara að dusta rykið af skónum hans Rögnvaldar B Johnsen, sem lék síðast hér á Akureyri með KA tímabilið 2005-2006. Rögnvaldur stundar einmitt nám í viðskiptafræði á fjármálasviði við HA. Þá vantar bara að nefna markvörð liðsins og hann er ekki af lakari endanum, einn af okkar mönnum í útlandinu, Hreiðar Levý Guðmundsson landsliðsmarkvörður og leikmaður Sävehof í Svíþjóð er reyndar skráður fjarnemi í viðskiptafæði við Háskólann á Akureyri.