Árni Þór Sigtryggsson genginn til liðs við Akureyri Handboltafélag

Í gærkvöldi (þriðjudag) gengu Árni Þór Sigtryggsson og Akureyri Handboltafélag formlega frá samningi um að hann leiki með liðinu á komandi leiktímabili. Þetta eru stórkostlegar fréttir fyrir handboltann á Akureyri en Árni er örvhent skytta og frábær spilari sem öll lið vilja hafa í sínum röðum. Það þarf varla að kynna Árna fyrir Akureyringum, hér er hann uppalinn og var lykilleikmaður í liði Þórs þar til hann að loknu menntaskólanámi hélt suður yfir heiðar til náms þar sem hann lék með Haukum í tvö tímabil en síðasta vetur lék hann með Granollers á Spáni.

Árni rifti samningi sínum við spænska liðið fyrir nokkru og ákvað að snúa aftur til Íslands. Viðræður hans og Akureyrar Handboltafélags hafa staðið í nokkurn tíma og var formlega gengið frá samningnum í gærkvöldi. Árni hefur æft með Akureyrarliðinu undanfarnar vikur og lék með liðinu á Reykjavík Open mótinu um síðustu helgi og stóð sig frábærlega eins og liðið allt.

Við bjóðum Árna velkominn heim aftur og efumst ekki um að þessi tíðindi hleypa nýjum krafti og eldmóði í handboltann á Akureyri.


Við látum hér fljóta með mynd frá 2003 af Árna Sigtryggssyni ásamt Árna Þórarinssyni og Arnóri Atlasyni en þá urðu þeir Evrópumeistarar með landsliði Íslands 18 ára og yngri og eru hér að taka við viðurkenningu frá Akureyrarbæ.