2. flokkur: Stórsigur á Fram 39-25 (myndir)

Það var ekki mikil gestrisni hjá Akureyrarstrákunum þegar þeir tóku á móti Fram í dag. Þrátt fyrir hálftíma bið eftir að leikurinn hæfist vegna seinkunar á flugi mættu strákarnir einbeittir og fyllilega klárir í slaginn. Og ljóst að strákarnir ætluðu ekki að lenda í neinu strögli í dag. Vörnin var öflug og ekkert hálfkák á hlutunum.

Akureyri náði fljótlega þægilegri stöðu 7-3 og sá munur hélt áfram að aukast jafnt og þétt þannig að eftir tæplega tuttugu mínútna leik var staðan orðin 14-5. Siguróli fór á kostum í markinu og varði meðal annars tvö vítaköst á þessum tíma.

Munurinn hélt bara áfram að aukast og í leikhléi var staðan orðin 24-12 og einungis spurning hversu stór sigurinn yrði. Eins og áður segir fór Siguróli hamförum í markinu og varði 12 skot í hálfleiknum, eða 50% markvarsla.

Eins og gefur að skilja var seinni hálfleikurinn aðeins formsatriði, allir útileikmennirnir í hópnum fengu að spreyta sig og komust allir vel frá sínu. Óhjákvæmilega misstu menn einbeitinguna að einhverju leyti og leyfðu sér ýmiss konar tilraunamennsku. Þar á meðal sýndu strákarnir listir sínar þegar þeir tóku þrefaldan sirkus sem gekk fullkomlega upp og uppskáru mikil fagnaðarlæti fyrir atvikið.

Það er skemmst frá því að segja að leiknum lauk með fjórtán marka sigri 39-25 og ljóst að verulegur gæðamunur er á þessum liðum.

Eins og áður segir tóku allir útileikmennirnir virkan þátt í leiknum og allir skoruðu þeir en mörkin dreifðust sem hér segir: Anton, Atli, Halldór og Oddur 5 mörk hver, Ágúst 4, Ásgeir, Geir og Jón Þór 3 mörk hver, Guðmundur og Heiðar Þór 2 mörk hvor og loks Hákon og Valþór 1 mark hvor.
Siguróli stóð í markinu allan leikinn og átti sannkallaðan stórleik í fyrri hálfleik en í allt varði hann 19 skot og þar af 2 vítaköst.






Þórir Tryggvason var með myndavélina á leiknum í dag.

Það er ástæða til að óska strákunum og Geir þjálfara til hamingju með glæsilegan árangur á leiktíðinni en liðið hefur leikið tíu leiki og farið með sigur í þeim öllum.

Nú er framundan hlé hjá strákunum, næsti deildarleikur er ekki fyrr en 10. janúar þegar Haukar koma í heimsókn en einnig er rétt að benda á að Akureyri og Fram drógust saman í 8-liða úrslitum bikarkeppninnar og verður sá leikur í Framheimilinu en tímasetning liggur ekki fyrir.