
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!

Stemmingin í úrslitakeppnum er engu lík

16. apríl 2010 - Akureyri handboltafélag skrifar

Úrslitakeppnin 2002: fyrsti hluti, 8 liða úrslitin

Á næstu dögum verða hér rifjuð upp úrslitakeppni Íslandsmótsins árið 2002. Það ár léku 14 lið í deildarkeppninni sem lauk eins og hér segir:

Nr.	Félag	Leikir	U	J	T	Mörk	Nett	Stig
1.	Haukar	26	21	2	3	743:671	72	44
2.	Valur	26	16	4	6	686:616	70	36
3.	Afturelding	26	13	5	8	649:628	21	31
4.	Grótta KR	26	14	3	9	673:658	15	31
5.	KA	26	11	8	7	677:629	48	30
6.	ÍR	26	14	2	10	662:637	25	30
7.	Þór Ak.	26	12	4	10	759:735	24	28
8.	FH	26	11	6	9	700:677	23	28
9.	Fram	26	10	7	9	663:629	34	27
10.	Selfoss	26	10	2	14	707:719	-12	22
11.	ÍBV	26	9	3	14	694:730	-36	21
12.	HK	26	6	4	16	700:723	-23	16
13.	Stjarnan	26	6	3	17	668:763	-95	15
14.	Víkingur	26	1	3	22	586:752	-166	5

Eins og sést hafnaði KA í 5. sæti deildarinnar og Þór í því 7. Átta efstu liðin fóru í úrslitakeppnina á þessum árum en eins og sést þá var harður slagur um að komast í keppnina og réðst ekki fyrr en í síðustu umferðinni. Haukar unnu deildarkeppnina með yfirburðum eins og hér sést og ljóst að liðið sem lenti í 8. sætinu myndi fá það erfiða hlutverk að mæta þeim í 8 liða úrslitunum. Þess skal getið að einhver öflugasti leikmaður Haukaliðsins var enginn annar en Rúnar Sigtryggsson núverandi þjálfari Akureyrar.

Í síðustu umferð deildarkeppninnar sigraði FH Selfyssinga 32-25 og fögnuðu gríðarlega þar sem þeir töldu sig þar með hafa náð 7. sætinu og þar með losnað við að mæta Haukum. En gleði þeirra reyndist skammvinn því að Þór gerði sér lítið fyrir og vann Aftureldingu á sama tíma 35-27 og náði 7. sætinu á eins marks hagstæðari markamun. Raunar var þetta í fyrsta sinn sem Þór náði inn í úrslitakeppnina og því sögulegt ár fyrir Þór.

Leikmenn Þórs, Árni Sigtryggsson og Páll V. Gíslason, fagna hér ásamt stuðningsmönnum sigri á Aftureldingu og sæti í úrslitakeppninni í fyrsta skipti.

KA hafði hins vegar átt fast sæti í úrslitakeppninni um nokkurra ára skeið og höfðu einmitt leikið úrslitarimmuna gegn Haukum árið áður en það einvígi sigruðu Haukar 3-2.

Ef við skoðum leikmenn liðanna þetta tímabil þá var leikmannahópurinn sem hér segir:

KA
Markverðir
Egidijus Petkevicius
Hans Hreinsson
Kári Garðarsson

Útileikmenn
Andrius Stelmokas
Arnar Þór Sæþórsson
Arnór Atlason
Árni Björn Þórarinsson
Baldvin Þorsteinsson
Egill Thoroddsen
Einar Logi Friðjónsson
Haddur Júlíus Stefánsson
Halldór Jóhann Sigfússon
Heiðmar Vilhjálmur Felixson
Heimir Örn Árnason
Hreinn Þór Hauksson
Ingólfur Ragnar Axelsson
Jóhann Gunnar Jóhannsson
Jóhannes Ólafur Jóhannesson
Jónatan Þór Magnússon
Sævar Árnason

Þjálfari
Atli Hilmarsson

Þór
Markverðir
Björn Björnsson
Eðvarð Eðvarðsson
Hafþór Einarsson

Útileikmenn
Aigars Lazdins
Arnar Gunnarsson
Árni Þór Sigtryggsson
Bergþór Morthens
Bjarni Gunnar Bjarnason
Brynjar Þór Hreinsson
Geir Kristinn Aðalsteinsson
Goran Gusic
Halldór Oddsson
Hörður Fannar Sigþórsson
Kristján Rúnar Gylfason
Páll Viðar Gíslason
Rene Smed Nielsen
Sigurður Brynjar Sigurðsson
Vernharð Sigurst Þorleifsson
Þorvaldur Sigurðsson
Þorvaldur Þorvaldsson

Þjálfari
Sigurpáll Árni Aðalsteinsson

Eins og sjá má eru hér á ferðinni margir kappar sem eru í fullu fjöri í dag og koma við sögu hér seinna í pistlinum.

Í átta liða úrslitunum mættust Haukar og FH, Valur og Þór, Afturelding og ÍR og síðan Grótta/KR og KA. Fyrstu leikirnir fóru fram þann 17. apríl, Haukar unnu FH örugglega 26-17, Afturelding lagði ÍR 22-19.

Valur - Þór

Á Hlíðarenda sigraði Valur lið Þórs 29-24. Við leit í gagnasafni Morgunblaðsins finnst ekki umfjöllun um leikinn en þar er þó eftirfarandi samantekt:

Gangur leiksins: 0:1, 2:1, 5:4, 7:4, 9:6, 11:6, 11:7, 14:8. 14:9, 16:9, 18:11, 20:14, 23:14, 25:17, 27:21, 28:23, 29:23.

Mörk Vals: Markús Máni Michaelsson 5/1, Snorri Steinn Guðjónsson 5/1, Sigfús Sigurðsson 5, Bjarki Sigurðsson 5, Freyr Brynjarsson 4, Ásbjörn Stefánsson 3, Einar Gunnarsson 2.
Utan vallar: 4 mín.

Mörk Þórs: Páll Viðar Gíslason 11/4, Þorvaldur Þorvaldsson 2, Þorvaldur Sigurðsson 2, Árni Sigtryggsson 2, Aigars Lazdins 2, Sigurpáll Árni Aðalsteinsson 2, Goran Gusic 2, Bjarni G. Bjarnason 1.
Utan vallar: 4 mín.

Grótta/KR - KA

Á Seltjarnarnesi mættust Grótta/KR og KA í baráttuleik sem fór í framlengingu. Í gagnasafni Morgunblaðsins er umfjöllun blaðamannsins Skúla Unnar Sveinssonar um leikinn:

KA réð við Hlyn og Petersons
Það munaði minnstu að KA-mönnum tækist ekki að yfirstíga Hlyn Morthens, markvörð Gróttu/KR, og Aleksandrs Petersons, stórskyttu liðsins, er liðin mættust í fyrsta leiknum í 8 liða úrslitum handknattleiks karla í gærkvöldi. Leikið var á Seltjarnarnesi og fögnuðu gestirnir sigri, 28:27, eftir framlengingu.

Lokamínúturnar í leiknum voru æsispennandi, bæði eftir klukkustundarleik og ekki síður í lok framlengingarinnar. Petersons skoraði á síðustu sekúndunni í leiknum og tryggði framlengingu, stökk upp fyrir utan eftir aukakast og sendi boltann í markið, eins og hann gerði fimmtán sinnum í gærkvöldi. Staðan var 23:23. „Það var ekki skemmtilegt að fara til búningsklefans eftir þetta mark og við höfðum líka klúðrað dálítið í lok leiksins og hleyptum þeim þannig inn í hann þannig að þeir náðu að jafna,“ sagði Atli Hilmarsson, þjálfari KA.

Heimamenn gerðu tvö mörk í fyrri hálfleik framlengingarinnar en gestirnir eitt, en þetta breyttist í síðari hlutanum. Þá gerðu gestirnir fjögur mörk úr jafn mörgum sóknum en heimamenn tvö. Staðan var 26:27 þegar rétt rúm mínúta var eftir og hafði Heiðar Felixson skorað úr víti og komið KA yfir. Það þótti reyndar tíðindum sæta á Seltjarnarnesi í gærkvöldi þegar KA-menn skoruðu úr vítaköstum því þeir fengu alls níu vítaköst, skoruðu úr þremur en Hlynur Morthens varði sex. Frábær dagur hjá honum.

Petersons skoraði þegar tíu sekúndur voru eftir og jafnaði og töldu menn því að aftur þyrfti að grípa til framlengingar. En KA-menn eru þekktir fyrir að vera snöggir að byrja á miðju og það gerðu þeir svo sannarlega. Jónatan Magnússon rakti boltann fram, snéri af sér einn varnarmann og gaf út í hornið á Hrein Hauksson sem stakk sér inn úr horninu og skoraði úr þröngu færi, hans eina mark í leiknum. Jónatan sá síðan til þess að heimamenn næðu ekki að byrja á miðju, hljóp harkalega á leikmann sem ætlaði að hefja leikinn á ný.

Hjá KA átti Egidijus Petkevicius fínan leik í markinu. Vörnin var 3-2-1 misjafnlega áköf en lengstum þokkalega sterk. Heimir Örn Árnason lék vel í sókninni og það sama má segja um Einar Loga Friðjónsson sem kom inn fyrir Heiðmar, sem náði sér ekki á strik í sókninni. Liðið var að öðru leyti jafnt og tíu leikmenn skoruðu í leiknum á meðan sex komust á blað hjá heimamönnum.

Gangur leiksins: 1:0, 3:1, 3:3, 5:3, 5:3, 10:8, 10:10, 11:12, 12:12, 12:13, 14:16, 15:18, 18:19, 18:21, 22:22, 23:23, 24:23, 25:24, 25:26, 26:27, 27:28.

Mörk Gróttu/KR: Aleksandrs Petersons 15, Kristján Þorsteinsson 5, Magnús A. Magnússon 3/2, Atli Þór Samúelsson 2/2, Davíð Ólafsson 1, Gísli Kristjánsson 1.
Utan vallar: 12 mínútur (Magnús A. Magnússon fékk þrjár brottvísanir). Auk þess fékk Atli Þór Samúelsson rautt eftir að leikurinn var úti.

Mörk KA: Heimir Örn Árnason 8, Jóhann G. Jóhannsson 4, Heiðmar Felixson 4/2, Einar Logi Friðjónsson 3, Jónatan Þór Magnússon 3/1, Andrius Stelmokas 2, Sævar Árnason 1, Halldór Sigfússon 1, Hreinn Hauksson 1, Baldvin Þorsteinsson 1.
Utan vallar: 14 mínútur.

Átta liða úrslitunum var síðan framhaldið 19. apríl og þar kláruðu Haukar FH 28-23 og Afturelding sigraði ÍR 34-33.

Þór - Valur

Í Íþróttahöllinni tók Þór á móti Val og þar var jafnt í hálfleik 13-13 en að lokum reyndust Valsarar sterkari og sigruðu 28-32. Það eina sem fannst um leikinn í gagnasafni Morgunblaðsins var meðfylgjandi mynd af Þorvaldi Þorvaldssyni og myndatexti.

Þorvaldur Þorvaldsson, línumaður Þórs, kominn í upplagt marktækifæri gegn Snorra Steini Guðjónssyni og samherjum hans í Val í leik liðanna á Akureyri í gær.

Einnig kom fram að Þór skoraði 3 mörk úr langskotum, 9 eftir gegnumbrot, 3 úr hraðaupphlaupum, 4 úr hornum, 4 af línunni og 5 úr vítum.

Þórir Tryggvason, ljósmyndari okkar sendi okkur síðan þrjár myndir frá leiknum

Þorvaldur Sigurðusson kominn framhjá Snorra Steini og skýtur á Ronald Eratze

Páll Gíslason í heljargreipum Sigfúsar Sigurðssonar

Þorvaldur Þorvaldsson svífur inn af línunni og skorar

KA - Grótta/KR

Í KA heimilinu tóku KA menn á móti Gróttu/KR og í gagnasafni Morgunblaðsins er umfjöllun Einars Sigtryggssonar:

KA-menn sneru við blaðinu

Alexandrs Petersons, leikmaður Gróttu/KR, skorar eitt fimm marka sinna gegn KA nyrðra í gær. KA-menn höfðu betri gætur á Petersons að þessu sinni en á miðvikudaginn þegar hann skoraði 15 mörk.

Gestirnir byrjuðu leikinn mun betur þrátt fyrir að KA tæki Aleksandrs Petersons úr umferð. Þeir skoruðu hvert markið af öðru á meðan KA komst hvergi gegn sterkri vörn þeirra en auk þess var Hlynur Morthens í markinu mjög góður. KA nýtti aðeins tvær af tíu fyrstu sóknum sínum og staðan eftir 13 mínútur var 2:6. Atli Hilmarsson breytti þá yfir í 6-0 vörn og við það komst KA smám saman inn í leikinn. Gróttustrákarnir gáfu þó lítið eftir og héldu þriggja marka forystu þar til í restina. Þeir misnotuðu þá fimm sóknir í röð og KA jafnaði í 10:10 fyrir hlé.

Meðbyr heimamanna hélt áfram í upphafi síðari hálfleiks. Þeir náðu forystu í fyrsta skipti í leiknum 11:10 og eftir tíu mínútur var staðan 13:12. KA klúðraði víti, missti svo mann útaf og Grótta/KR náði að jafna 14:14. KA komst fljótt aftur í tveggja marka forystu og eftir það voru heimamenn með undirtökin allt til loka. Gróttustrákarnir minnkuðu muninn tvívegis í eitt mark en KA hleypti þeim ekki nær enda var vörn þeirra gríðarlega sterk og Petkevicius varði vel. Munurinn var tvö mörk er tvær mínútur lifðu.

Grótta/KR freistaði þess að jafna en kappið var fullmikið og KA jók forystuna í fjögur mörk. Sætur sigur þeirra var staðreynd og fögnuðurinn meðal stuðningsmanna var mikill.

Það var fyrst og fremst sterkur varnarleikur og góð markvarsla sem skóp sigur KA. Þeim tókst að halda Aleksandrs Petersons niðri. Menn skiptust á að koma vel út í hann svo hann komst lítið á flug. Sóknin var ekkert sérstök en Heimir Örn og Heiðmar áttu góða spretti ásamt Stelmokas inná línunni. Baldvin Þorsteinsson kom svo inná síðasta hlutann og skoraði þrjú glæsileg mörk úr vinstra horninu.

Heimir Örn Árnason í baráttu gegn Alexander Peterson leikmann Gróttu/KR

„Við vorum ekki í standi fyrstu tíu mínúturnar en eftir að við breyttum í 6-0 vörn fór að ganga mun betur. Strákarnir spiluðu vörnina sérlega vel og markvarslan var fín. Mér líst vel á að fá Haukana. Þeir eru með besta lið landsins en við ætlum að reyna að standa í þeim. Við töpuðum fyrir þeim hérna í úrslitaleiknum í fyrra og kannski er ágætt að byrja á útivelli núna. Við erum hvergi hræddir og eigum möguleika gegn þeim,“ sagði Atli Hilmarsson, þjálfari KA.
Mörk KA komu þannig: 6 mörk úr langskotum,3 eftir gegnumbrot, 4 úr hraðaupphlaupum, 2 úr hornum, 5 af línunni og 3 úr vítum.

Það voru því Haukar, Valur, Afturelding og KA sem komust í 4 liða úrslitin, öll eftir 2-0 sigur í sínum viðureignum. Í 4 liða úrslitunum mættust annars vegar Haukar og KA og hins vegar Valur og Afturelding.
Í næsta pistli fjöllum við um einvígi Hauka og KA.

Fletta milli frétta

Til baka

Senda á Facebook

Umsjón og hönnun: Stefán Jóhannsson og Ágúst Stefánsson