Árni Þór Sigtryggsson til TSV Dormagen

Nú rétt í þessu voru að berast þau tíðindi að Árni Þór Sigtryggsson hafi samið til eins árs við þýska liðið TSV Dormagen. Vitað er að hugur Árna hefur staðið til að leika erlendis en sem kunnugt er lék hann með BM Granollers á Spáni tímabilið 2007-2008 áður en hann kom heim til Akureyrar á ný.

Við sendum Árna bestu hamingjuóskir með þennan áfanga og óskum honum velfarnaðar í þýska boltanum næsta tímabil.

Á heimasíðu Dormagener er greint frá því að samningurinn sé frágenginn og þeir séu ánægðir með að hafa fengið Árna í sínar raðir. Jafnframt er þess getið að nafnið Sigtryggsson sé vel þekkt í þýska handboltanum en Rúnar, eldri bróðir Árna er Þjóðverjum að góðu kunnur eftir að hafa leikið með Eisenach og Wallau-Masssenheim.

Áhugamenn um þýsku geta rifjað upp þýskukunnáttuna með því að lesa fréttina á heimasíðu Dormagen. Raunar kemur fram á þýsku síðunni að Árni hafi leikið með KA síðastliðin tvö ár þannig að þýska nákvæmnin hefur örlítið brugðist hvað þetta varðar.