Úrslitakeppnin 2002: Valur - KA (leikur 5)


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Æsilegri úrslitakeppni lauk með frábærum sigri Norðanmanna 2002		31. maí 2010 - Akureyri handboltafélag skrifar Úrslitakeppnin 2002: Valur - KA (leikur 5) Það er orðið tímabært að enda upprifjunina frá úrslitakeppninni árið 2002 og komið að fimmta og síðasta leik úrslitaeinvígisins sem fram fór að Hlíðarenda, heimavelli Vals föstudaginn 10. maí. Reyndar var vitað að það hús væri alltof lítið til að hýsa slíkan úrslitaleik og voru háværar raddir um að flytja leikinn í Laugardalshöllina en Valsmenn voru ekki á þeim buxunum, vildu kannski eðlilega halda í sinn heimavöll. Áhuginn á leiknum var gríðarlegur og til marks um það tók hundrað manna hópur stuðningsmanna á Akureyri tvær Fokker vélar á leigu til að komast á leikinn. Stemmingin var í lagi á flugvellinum Flugstjórinn klár í að leggja í hann Að sjálfsögðu voru þeir 1200 miðar sem í boði voru löngu uppseldir og húsið orðið troðfullt klukkutíma fyrir leik. Leikmenn hituðu því upp fyrir leikinn í dúndrandi stemmingu. Alli Páls stjórnar stuðningsmönnunum af sinni alkunnu snilld Samúel Jóhannsson lét sig ekki vanta á leikinn Kristján Þór Júlíusson, þáverandi bæjarstjóri og Ingibjörg Sólrún Gísladóttir borgarstjóri voru á meðal áhorfenda og sömuleiðis forsetinn, herra Ólafur Ragnar Grímsson. Að vanda styðjumst við hér við umjöllun Morgunblaðsins og DV-Sport um leikinn og litmyndirnar eru úr safni Þóris Tryggvasonar. Byrjum á Morgunblaðinu, það er Skúli Unnar Sveinsson sem skrifar: KA tókst hið ómögulega KA-menn gerðu hið ómögulega í gærkvöldi. KA varð þá Íslandsmeistari í handknattleik karla, lagði Valsmenn á Hlíðarenda 24:21 og sigraði því 3-2 í rimmunni eftir að hafa lent 2-0 undir. Flestir höfðu þá afskrifað KA-pilta en undir traustri stjórn Atla Hilmarssonar þjálfara og gríðarlega vel hvattir af stuðningsmönnum sínum, gáfust þeir ekki upp og sönnuðu enn einu sinni að íþróttakappleikur er ekki búinn fyrr en flautað hefur verið til leiksloka. Leikmenn mættu gríðarlega vel stemmdir til leiks og vörn heimamanna tók hressilega á móti gestunum og ætlaði greinilega að sýna þeim að hún yrði ekki auðunnin. Bæði lið léku með flata vörn og átökin voru gríðarleg, jafnt á flestum tölum og munurinn aldrei meiri en eitt mark. Sóknir liðanna voru heldur þreytulegar á köflum enda varnirnar illvígar og færi gáfust því ekki á mörkum. Markverðirnir voru einnig í stuði og vörðu vel. Valsmenn léku lengstum með einn línumann en upp úr miðjum hálfleik tóku þeir til við að skella tveimur stöku sinnum inn á línuna. Hraðaupphlaup sáust varla enda voru allir leikmenn eldfljótir í vörn ef bolti tapaðist. Gestirnir frá Akureyri mættu til leiks í síðari hálfleik með 3-2-1-vörnina sína og nú var Hreinn Hauksson mættur þar í stað Heimis Arnar Árnasonar sem hafði gott af því að fá aðeins að hvíla sig, enda erfitt að kljást við sóknarmenn Vals og síðan standa vaktina í sókninni líka. Stemningin í húsinu var einstök, stuðningsmenn KA mun færri en létu vel í sér heyra þannig að vart mátti á milli sjá hvort liðið var á heimavelli. Hitinn var mikill, spennan ekki síðri og það kom að því að upp úr sauð. Eftir að Egidijus Petkevicius, makvörður KA, varði vítakast frá Markúsi Mána Mikaelssyni lentu Andrius Stelmokas og Bjarki Sigurðsson í gólfinu þegar þeir börðust um frákastið. Bjarki trylltist gjörsamlega og litlu munaði að allsherjar slagsmál brytust út meðal leikmanna. Til þess kom sem betur fer ekki og Stelmokas og Bjarki fengu að hvíla sig í tvær mínútur og komu síðan endurnærðir til leiks á ný. Heimir Örn Árnason skorar eitt af þrem mörkum sínum í leiknum Á þessum kafla gekk illa hjá heimamönnum og KA breytti stöðunni úr 14:13 í 14:17 þegar síðari hálfleikur var rétt hálfnaður. Tíu mínútur liðnar af seinni hálfleik og allt í járnum, staðan 14-14 „Flott strákar, eitt mark enn,“ kallaði Atli stöðugt til sinna manna og strákarnir fóru að ráðum hans. Valsmenn náðu að rétta sinn hlut, 16:17, og þannig var staðan heillengi eða þar til Sævar fyrirliði Árnason skoraði úr hraðaupphlaupi þegar sjö mínútur voru eftir. Petkevicius stóð heldur betur fyrir sínu á þessum tíma, varði tvö vítaköst til viðbótar, og Valsmenn komu knettinum hreinlega ekki framhjá honum. Þegar fjórar mínútur voru eftir var staðan orðin 17:21 og nokkuð ljóst í hvað stefndi. Valsmenn reyndu í lokin að leika vörnina maður-á-mann um allan völl og gerðu tvö mörk, 20:22, en komust ekki lengra. KA-liðið er alveg ótrúlegt. Baráttan er þvílík að unun er á að horfa og það segir auðvitað sína sögu um liðið að sigra tvívegis á Hlíðarenda eftir að hafa lent 2-0 undir í rimmunni. Það gera ekki nema góð lið. Gangur leiksins: 0:1, 2:1, 4:5, 7:6, 7:8, 9;8, 10:9, 11:9, 12:12, 14:13, 14:17, 16:17, 17:18, 17:21, 20:22, 20:24, 21:24. Mörk Vals: Sigfús Sigurðsson 6, Snorri Steinn Guðjónsson 5, Markús Máni Michaelsson 3, Bjarki Sigurðsson 3/1, Ásbjörn Stefánsson 2, Einar Gunnarsson 1, Geir Sveinsson 1. Markvarsla: Roland Eradze 17 (3 til mótherja); 11 (2) langskot, 2 (1) eftir gegnumbrot, 2 eftir hraðaupphlaup, 1 af línu, 1 úr horni. Utan vallar: 10 mínútur. Mörk KA: Halldór Sigfússon 8/2, Jóhann G. Jóhannsson 4, Sævar Árnason 4, Heimir Örn Árnason 3, Andrius Stelmokas 2, Heiðmar Felixson 2, Einar Logi Friðjónsson 1. Markvarsla: Egidijus Petkevicius, KA: 20/3 (7/1 til mótherja); 11 (3) langskot, 3 (1) víti, 2 (2) eftir gegnumbrot, 2 (1) af línu, 1 eftir hraðaupphlaup, 1 úr horni. Utan vallar: 10 mínútur en þar af fékk Hreinn Hauksson 2ja mínútna brottvísun þegar 2 sekúndur voru til leiksloka. Dómarar: Gunnar Viðarsson og Stefán Arnaldsson. Stóðu sig með miklum sóma. Áhorfendur: Fullt út úr dyrum, trúlega um 1.300 manns. Einar Logi Friðjónsson, Sævar Árnason og Halldór Sigfússon með bikarana sem KA-menn fengu afhenta í leikslok Leiknum lauk aldrei Þegar tvær sekúndur voru til leiksloka í leik Vals og KA í gærkvöldi, rak Stefán Arnaldsson, annar dómari leiksins, Hrein Hauksson, leikmann KA, af velli í tvær mínútur og reyndi að gefa tímaverði merki um að stöðva leikklukkuna. Það tókst ekki og þegar gulklæddir leikmenn KA og einslitir stuðningsmenn flykktust inn á leikvöllinn horfði Stefán í kring um sig og sá að vonlaust verk var að láta rýma völlinn til að láta liðin leika þær tvær sekúndur sem eftir voru. Hann hristi því bara höfuðið og gekk af velli. KA-menn fagna Íslandsmeistaratitlinum á Hlíðarenda og Halldór Sigfússon er þar fremstur í flokki. „Kemst næst því þegar dóttir mín fæddist“ „Tilfinningin er ótrúleg. Þetta kemst næst því þegar dóttir mín fæddist,“ sagði Halldór Jóhann Sigfússon, leikstjórnandi KA í viðtali við Björn Gíslason hjá Mbl. eftir sigurinn. Hann fór fyrir sínum mönnum og skoraði átta mörk í leiknum. Aðspurður hvort undirbúningurinn fyrir leikinn hefði verið öðruvísi en fyrir hina fjóra leikina sagði Halldór að svo væri ekki. „Við þekkjum þetta náttúrlega frá því í fyrra og þar töpuðum við í fimmta leik og við ætluðum ekki að láta það gerast aftur.“ Halldór sagði að sú reynsla hefði vegið nokkuð í leiknum í gær. „Geiri (Geir Sveinsson), Fúsi (Sigfús Sigurðsson) og Einar Gunnarsson hafa gengið í gegnum svona úrslitakeppni áður en líklega eru fleiri leikmenn hjá þeim sem hafa ekki gert það og við kannski reynslunni ríkari frá því í fyrra.“ Halldór var í síðasta meistaraliði KA árið 1997 sem lagði Aftureldingu undir stjórn Alfreðs Gíslasonar. Þegar hann var inntur eftir því hvort annar sigurinn hefði verið sætari en hinn sagði Halldór að erfitt væri að bera þá saman. „Við unnum heima fyrir fimm árum í troðfullu húsi og brjálaðri stemningu. Núna er maður meiri hluti af liðinu þannig að það er kannski meiri sigur fyrir mann sjálfan.“ KA-liðið flaug heim í gærkvöld og Halldór bjóst við að Akureyringar myndu taka vel á móti því. „Flugvöllurinn verður vonandi fullur af fólki,“ sagði leikstjórnandinn og brosti. Glæsilegur endir Atli Hilmarsson lauk fimm ára dvöl sinni á Akureyri á glæsilegan hátt í gærkvöld þegar hann stýrði KA-mönnum til Íslandsmeistaratitilsins í handknattleik karla. Þeir unnu það ótrúlega afrek að snúa einvíginu gegn Val sér í hag og unnu sinn annan sigur í röð á Hlíðarenda, 24:21, í fimmta og síðasta úrslitaleiknum. Atli fékk að sjálfsögðu flugferð eftir leikinn Stefán Stefánsson blaðamaður Mbl ræddi við Atla eftir leikinn. Að koma hingað eftir að hafa tapað tveimur fyrstu leikjunum en unnið næstu tvo gaf okkur vissan andlegan stuðning - við vorum komnir með vind í seglin, kátir og vissum að við gætum unnið hérna," sagði Atli við Morgunblaðið eftir leikinn. Þjálfarinn sagði sína menn aldrei hafa slegið af. „Það gekk mjög vel að ná baráttuanda í liðið. Þessir strákar eru fæddir sigurvegarar og vilja ekkert annað en að vinna, enda aldir þannig upp í yngri flokkunum hjá KA og halda því áfram í meistaraflokki. Sigurinn vannst helst á því að trú á sigur er alltaf til staðar. Við gáfumst aldrei upp og héldum áfram þó að við lentum í vandræðum. Til dæmis þegar við vorum einum fleiri án þess að skora en fáum á okkur tvö mörk. Önnur lið hefðu farið á taugum en við héldum áfram. Það skiptir eflaust máli að við erum minnugir fimmta leiksins við Hauka í fyrra þegar við vorum á heimavelli en fórum á taugum á meðan Haukar komu svellkaldir og unnu okkur með eðlilegum leik. Það ætluðum við að gera í dag og ég held að það hafi tekist þokkalega. Svo var stemmningin í kringum okkur frábær. Varamannabekkurinn fagnaði hverju marki eins og allt okkar stuðningsfólk.“ Atli tók við KA 1997 eftir að Alfreð Gíslason hafði gert liðið að Íslandsmeisturum. „Það sögðu allir að ég væri klikkaður að fara norður og taka við af Alfreð Gíslasyni en þetta hefur verið frábært. Ég tek við þegar KA var Íslandsmeistari 1997 og missi strax sjö menn, Duranona og fleiri. Þá komu þessir ungu strákar, sem spiluðu núna og urðu að fá sitt tækifæri. Þeir eru núna orðnir mjög góðir og sjóaðir, með reynslu, hafa tekið þátt í Evrópukeppni og keppt í meistaradeildinni,“ sagði Atli en hann fer nú, eins og Alfreð, til að taka við liði í Þýskalandi. „Nú feta ég í fótspor hans og vonast til að verða jafn sigursæll og hann. Ég geri mér vonir um það, er að fara í ágætis lið og vonandi verður þessi dvöl í Þýskalandi ánægjuleg.“ Sálfræðistyrkurinn réð úrslitum Egidijus Petkevicius markvörður var einn af bestu mönnum KA í leiknum í gærkvöld og varði 20 skot, þar af þrjú víti. Hann var nánast orðlaus þegar Morgunblaðið ræddi við hann eftir leikinn. „Þetta var ótrúlegur leikur og það er ótrúleg tilfinning að vinna hann. Leikurinn snerist um hvort liðið hefði meiri sálfræðistyrk og í þetta skiptið var það KA. Liðið var í úrslitunum í fyrra og það kom því til góða í ár.“ Petkevicius lék með Valsmönnum í fyrra og sagði aðspurður að tilfinningarnar væru blendnar við sigurinn. „Tilfinningar mínar til Vals eru sterkar vegna þess að ég spilaði með þeim í fyrra og strákarnir þar eru allir vinir mínir. Það var því allt annað en auðvelt fyrir mig að mæta þeim í þessum úrslitaleikjum,“ sagði Petkevicius. Víkjum því næst að umfjöllun esá í DV-Sport um leikinn: KA er íslandsmeistari í handknattleik tímabilið 2001-2002, eftir frækilegan sigur á Valsmönnum í stórbrotinni úrslitarimmu. Eftir ótrúlegt tímabil í íslenska handboltanum er Íslandsmeistaratitillinn fyrir norðan, hjá KA. Það verður að teijast ein ótrúlegasta útkoma á Íslandsmóti í mörg, mörg ár þegar tekið er tillit til stöðu KA í vetur. Tímabilið byrjaði heldur brösulega hjá KA og beindist athyglin fremur að litla liðinu á Akureyri, Þór, sem var nýliðar í deildinni en náði engu að síður að gera usla í byrjun mótsins. Maður í manns stað KA-liðið hafði misst tvo lykilmenn frá tímabilinu á undan, þá Guðjón Val Sigurðsson og Hörð Flóka Ólafsson, en fengið til sín þá Heiðmar Felixson og Egidijus Petkevicius. Sá fyrrnefndi meiddist reyndar eftir aðeins tvo leiki og var frá í fáeinar vikur en þeir Sævar Árnason og Heimir Örn Árnason voru meiddir lengi vel í haust. Fyrsti sigurinn kom ekki fyrr en í 4. umferð. Áföllin hættu ekki að dynja yfir og ein helsta skytta liðsins, hinn ungi Arnór Atlason fótbrotnaði tvisvar á tímabilinu. Mótlætið var því mikið en liðið endaði í 5. sæti deildarinnar, í miðju hóps sjö liða sem aðeins 4 stig skildu að. Í fjórðungs- og undanúrslitum var svo tónninn gefinn. Bæði gegn Gróttu/KR og Haukum byrjaði liðið á útivelli en engu að síður tókst því að vinna bæði einvígin, 2-0. Sannarlega frábær árangur og óvæntur, sér í lagi þar sem Haukar höfðu unnið deildina með yfirburðum og voru langsigurstranglegastir í úrslitakeppninni. Svo kom úrslitarimman gegn Val. Fyrstu tveir leikirnir fóru báðir í framlengingu og enduðu báðir með sigri Vals. Þá var það einfaldlega að duga eða drepast fyrir norðanmenn. Taktísk breyting á varnarleik KA skilaði sigrum í næstu tveimur leikjum, jafnaði einvígið og var komið að hreinum úrslitaleik sem fór fram á föstudaginn. Einkar löngum aðdraganda var loksins lokið og komið að mikilvægasta leik ársins. Óviðjafnanleg stemning Stemningin í íþróttahúsinu við Hlíðarenda var ótrúleg. Þótt aðeins væru rúmlega þúsund manns inni í salnum var svo þétt setið og hátt kallað að auðveldlega virtist vera tífalt fleiri áhorfendur á leiknum. Stemmingin hreint út sagt mögnuð Og þó að KA-menn skoruðu fyrsta mark leiksins leit allt út fyrir að Valsmenn væru eftir smálægð komnir aftur á fulla ferð. Markús Máni Mikaelsson skoraði í sinni fyrstu sókn eftir góðan undirbúning Snorra Steins Guðjónssonar en þeir tveir sáu um fyrstu fjögur mörk sinna manna á meðan Roland Eradze varði oft glæsilega í Valsmarkinu. Þótt útlitið hafi verið gott fyrir Valsmenn voru KA menn alls ekki á því að gefast upp og var frammistaða þeirra á þessum kafla einkennandi fyrir leikinn - og liðið allt. Með mikilli seiglu leyfðu þeir Valsmönnum aldrei að komast of langt fram úr og alltaf náðu þeir að svara marki með marki. Frábær vörn Varnarleikur beggja liða, eins og í fjórða leiknum, var gífurlega góður og var mikið um hörku. Sóknirnar drógust oft á langinn og voru öll mörk nánast undantekningarlaust frábærlega gerð, enda lítið annað sem dugði í eins sterkum varnarleik. Vert er að minnast frammistöðu Halldórs Sigfússonar sem var sérlega vel gætt af Geir Sveinssyni í Valsvörninni en þrátt fyrir það tókst honum að skora nokkur glæsileg mörk. Í síðari hálfleik kom svo óvænt útspil hjá Atla Hilmarssyni, þjálfara KA. Hann ákvað að breyta út 6-0 vörninni sem hafði reynst svo vel í 3-2-1 vörnina sem KA spilaði í tapleikjunum. Valsmenn byrjuðu að leysa það vel í fyrstu sóknunum en á rúmlega 10 mínútna kafla breyttist staðan úr 12-10 í 14-17. Með það í huga að barátta KA-manna hafði verið þvílík allan leikinn gegn þessu firnasterku Valsliði þótti það frekar ljóst að það þætti of stór biti fyrir heimamenn. Markvarslan var lykillinn Á þessum kafla varði Egidijus Petkevicius stórkosflega. Hreint út frábærlega og skapaði í raun þessa afar mikilvægu forystu. Hann varði meðal annars víti frá Bjarka Sigurðssyni og þegar þeir Bjarki og Andrius Stelmokas börðust um frákastið sauð allt upp úr og sturlaðist sá fyrrnefndi hreinlega. Báðir uppskáru þeir 2ja mínútna brottvísun og bar þetta vitni um hina gífurlegu taugaspennu sem lá í loftinu. Valur minnkaði muninn í stöðunni 16-17. Nær komust þeir ekki enda leit hvert snilldarmarkið á fætur öðru hjá KA-mönnum dagsins ljós og undir lok leiksins voru örþrifaráð Valsmanna aðeins til að liðka fyrir í sóknarleik KA. Sigurinn var tryggður og Íslandsmeistaratitillinn í höfn. Leikinn var frábær handknattleikur að Hlíðarenda á föstudag og var leikurinn og allt sem honum tengdist ein hin allra besta skemmtun sem undirritaður hefur orðið vitni að. Til hamingju, KA. esá Maður leiksins: Egidijus Petkevicius, KA Ekkert betra en að kveðja Akureyri með þessum titli, sagði Atli Hilmarsson þjálfari KA Eftir að Alfreð Gíslason hafi leitt lið KA til síns fyrsta Íslandsmeistaratitils árið 1997, en horfið svo á brott til starfa erlendis, endurtekur eftirmaður hans, Atli Hilmarsson, leikinn nú 5 árum síðar. Sjálfsagt var stór hluti af hvatningu leikmanna KA fyrir að vinna titilinn að kveðja Atla á viðeigandi hátt. Og það stóðst, fáir fögnuðu betur en Atli sjálfur og var hann i sjöunda himni þegar DV-Sport náði af honum tali eftir leik. „Þessir drengir eru þvílíkt góðir og þó að þeir hafi gert þetta að hluta til fyrir mig var það fyrst og fremst fyrir þá sjálfa. Það er vitaskuld gaman að finna það að það hafi átt hlut að máli og auðvitað er engin betri leið til að kveðja Akureyri en með þessum stóra titli.“ - Frammistaða þinna manna í þessari úrslitakeppni var engri lík? „Ég held að allir sjái það í hendi sér að það hefði brotið einhvern að hafa lent undir 2-0 í einvíginu gegn Val og tapað í framlengingu í bæði skiptin. Gegn Haukum í undanúrslitum förum við svo í framlengingu í fyrri leiknum og vinnum eftir að hafa verið 8 mörkum undir í hálfleik og ég held að það skýri þetta orða best.“ - Hvað með taktísku breytingarnar á vörninni sem þú gerðir í hálfleiknum? „Ég varð að gera eitthvað, mér fannst vörnin ekki vera að virka nógu vel þar sem þeir voru að fá nokkur frí skot, ég tók ákveðinn séns með þessari breytingu í byrjun síðari hálfleiks til að koma þeim aðeins á óvart en svo sá ég að krafturinn var að þverra hjá mínum mönnum og ég varð að bakka með vörnina aftur. En þetta bar góðan árangur.“ - Hvað með framtíð KA sem handboltalið eftir að þú hverfurfrá störfum? „Mér líst mjög vel á framtíð KA, það er svo mikil hefð fyrir því að vinna hjá þessu félagi. Yngri flokkamir eru alltaf að vinna og það er hefð fyrir því að finna fyrir þessari sigurvímu. Þessir strákar sem eru að keppa fyrir meistaraflokk eru vanir því að vinna og þeir halda því bara áfram hér og láta að sér kveða strax. Ég vil líka þakka mínum mannskap, til að mynda markverðinum, en það voru allir að tala um að við ættum í vandræðum með markvörslu en ég spyr á móti, hver er að vinna þetta fyrir okkur í kvöld?" sagði Atli áður en hann hvarf á brott til að samfagna með leikmönnum og stuðningsmönnum KA-liðsins. -esá SMS hjá DV-Sport tók viðtöl eftir leikinn: Ótrúlegur vetur Hornamaðurinn Jóhann Gunnar Jóhannsson: Jóhann Gunnar Jóhannsson, leikmaður KA, var að taka á móti titlinum í annað sinn en óhætt er að segja að hann hafi átt frábæran lokasprett í leiknum: „Veistu, það var frábært að vinna 1997 en það er alveg yndislegt að vinna þetta núna og þá sérstaklega vegna þess að það eru svo margir strákar í liðinu uppaldir hjá félaginu og það sýnir að þolinmóð uppbygging skilar sér margfalt. Þetta er búinn að vera ótrúlegur vetur og margt búið að ganga á og það er í raun ekki fyrr en í lok deildakeppninnar sem við náum að stilla upp okkar sterkasta liði og þetta er einfaldlega meiri háttar afrek að koma og vinna tvisvar á Hlíðarenda, þetta er hálfótrúlegt miðað við allt sem á undan var gengið.“ KA-menn, með Jóhann Gunnar Jóhannsson fremstan í flokki, fagna Íslandsmeistaratitlinum (mynd Mbl). Um andstæðingana hafði Jóhann þetta að segja: „Þetta Valslið er einfaldlega bara þrælgott og við vissum að þetta yrði jafnt og spennandi. Við vorum hins vegar með það á tæru að ef við næðum að halda í við þá fram í síðari hálfleik þá tækjum við þetta í lokin og það gekk eftir,“ sagði Jóhann Gunnar Jóhannsson sigurreifur í leikslok. Baráttan, viljinn og einbeitingin Heimir Örn Árnason, KA: Eftir leikinn leit Heimir Örn Árnason, leikmaður KA, út eins og hann hefði verið að stíga út úr hringnum eftir tólf lotna bardaga við Mike Tyson. Eyrun voru þó á sínum stað þó að kappinn hafi verið alveg búinn og ég spyr hann hvað mikið sé eftir af honum? „Svona hálft prósent,“ segir Heimir og glottir. „Mér fannst við eiga rosalega mikið inni eftir tvo fyrstu leikina og þrátt fyrir vonda stöðu misstum við aldrei trúna. Við vorum einfaldlega að spila frábærlega hér í kvöld og sprungum út í seinni hálfleik. Það var baráttan og viljinn og einbeitingin sem gerði okkur þetta kleift,“ sagði Heimir Örn Árnason, lurkum laminn. -SMS Uppbyggingarstarfið að skila sér - segir Halldór J. Sigfússon, KA Halldór J. Sigfússon er án efa maður þessarar úrslitakeppni og er þá á engan hallað. Drengurinn var hreint út sagt ótrúlegur og fann alltaf glufur á frábærri vörn Valsmanna og ég spyr hann hvort þetta sé ekki toppurinn á tilverunni. „Þetta er allavega nálægt því," segir yfirvegaður og hógvær Halldór og bætir við: „Þegar maður er kominn út í svona rimmu verður maður einfaldlega að leggja sitt af mörkum og menn verða bara að standa saman sem einn. Það sveif mjög jákvæður andi yfir okkar liði fyrir leikinn og ef menn gerðu mistök þá var bara klappað á bakið, brosað og svo haldið áfram og þetta var hreinlega stórkostlegt hjá okkur. Það var rosalega sárt að tapa úrslitaleiknum á heimavelli í fyrra gegn Haukunum og við vorum alveg ákveðnir í því að láta það ekki endurtaka sig og það sást vel í kvennaboltanum um daginn að allt er hægt og aftur nú í kvöld. Framtíðin er björt hjá KA og það er vel staðið að uppbyggingarstarfinu hjá félaginu og það er einfaldlega málið í þessu. Menn verða að horfa lengra en eitt-tvö ár fram í tímann og það er nákvæmlega það sem bæði þessi lið, Valur og KA, eru að gera. Það þýðir ekkert að ausa bara peningum og horfa á næsta ár, menn verða að líta fram á veginn með þolinmæði, það skilar sér," sagði hinn frábæri leikmaður KA, Halldór J. Sigfússon. -SMS Eins og nú var Guðmundur Þórður Guðmundsson þjálfari karlalandsliðsins, hann var í viðtali við DV-Sport: Enn einn handboltasigurinn „Þetta var alveg ótrúlegt, leikurinn var eins og hinn besti „thriller“, ég verð að segja það. Eftir að hafa lent 2-0 undir þá sýna leikmenn KA ótrúlegan karakter og ég hafði það einhvern veginn á tilfinningunni eftir að þeir unnu þriðja leikinn hér að Hlíðarenda að einvígið færi í fimm leiki og KA-menn voru einfaldlega grimmari hér í kvöld. Það er hreinlega aðdáunarvert hversu mikið þeir fórnuðu sér í þetta og börðust fyrir titlinum. Valsmenn voru hins vegar að spila mjög góðan varnarleik í kvöld eins og í öllum hinum leikjunum en þeir áttu ekkert svar sóknarlega við varnarútspili Atla í síðari hálfleik. En þeir, eins og KA, stóðu sig stórkostlega í þessu einvígi og kvöldið í kvöld var enn einn sigurinn fyrir handbolta enda leikirnir allir mjög hraðir og skemmtilegir á að horfa. Þetta var alveg frábært,“ sagði Guðmundur landsliðsþjálfari. -esá Þar með látum við lokið upprifjun á úrslitakeppninni frá 2002, draumurinn var að sjálfsögðu að við myndum endurtaka leikinn núna í vor og við vorum svo sannarlega grátlega nærri því en við horfum full bjartsýni til næsta tímabils.
Fletta milli frétta	Til baka Senda á Facebook