2. flokkur: Stórleikur gegn Val í Höllinni í dag mánudag

Handknattleikstímabilið er hreint ekki búið fyrir Akureyringa þar sem 2. flokkur liðsins heldur merkinu uppi þessa dagana. Mánudaginn 15. apríl leika strákarnir gegn Val hér í Íþróttahöllinni og hefst leikurinn klukkan 19:00. Það eru leikin 8 liða úrslit í 2. flokki þar sem efstu sex liðin í deildarkeppninni leiða saman hesta sína ásamt tveim efstu úr 2. deildinni.

Akureyri hafnaði í 4. sæti 1. deildar og Valur í því 5. Aðeins er leikin einföld umferð þannig að ljóst er að sigurvegari þessa leiks heldur áfram í fjögurra liða úrslitin. Nú liggja fyrir úrslit hinna leikjanna og þar eru FH, Haukar og Afturelding búin að tryggja sig áfram. Það verða síðan annaðhvort Akureyri eða Valur sem mæta FH í fjögurra liða úrslitunum.

Akureyri og Valur mættust tvisvar í deildarkeppninni í vetur og voru báðir leikirnir hörkuspennandi. Fyrri leiknum sem var í Vodafone höllinni lauk með jafntefli 24-24 en Akureyri vann heimaleikinn með tveim mörkum, 28-26.

Akureyrarliðið varð Íslandsmeistari 2. flokks í fyrravor og ætlar sér að fara alla leið og verja titilinn. Til þess þarf að sjálfsögðu sigur á Val og ef það tekst þá tekur við útileikur gegn FH um það hvort liðið fer í úrslitaleikinn. Við hvetjum allt áhugafólk um handbolta til að fjölmenna í Íþróttahöllina og styðja strákana í væntanlega síðasta heimaleiknum hér fyrir norðan á tímabilinu. Það má gera ráð fyrir að í leikmannahópi Akureyrarliðsins verði 10 leikmenn sem hafa komið við sögu með meistaraflokki Akureyrar í vetur. Leikurinn hefst klukkan 19:00.


Ásgeir Jóhann Kristinsson hefur verið sem klettur í vörninni og leiðist ekki að bregða sér í sóknina