Nicklas var yfirburðamaður í sókninni en mátti ekki vera í rauðu undirtreyjunni
| | 9. febrúar 2015 - Akureyri handboltafélag skrifarValur sterkari í bikarslagnumEftir fyrri hálfleikinn í viðureign Akureyrar og Vals var erfitt að spá fyrir um hvort liðið færi með sigur af hólmi. Akureyri byrjaði betur í leiknum, komst í 2-0 og seinna í 5-2. Valsmenn náðu að jafna í 5-5 en Akureyri hélt frumkvæðinu áfram í leiknum með góðri vörn og markvörslu Tomasar. Það var ekki fyrr en eftir 27 mínútna leik sem Valur komst yfir í leiknum og þeir leiddu með eins marks mun í hálfleik, 10-11.
Það var hart barist í fyrri hálfleiknum, hér fýkur Orri Freyr Valsari út af fyrir brot á Halldóri Loga
Akureyri byrjaði seinni hálfleikinn, manni fleiri en misstu boltann klaufalega útaf og því miður gaf þessi sókn tóninn fyrir seinni hálfleikinn. Valsmenn tóku völdin á vellinum og skyndilega var forysta þeirra orðin fimm mörk, 11-16.
Sverre fékk enga afmælisgjöf frá dómurunum, tvær ódýrar brottvísanir
Heimir Örn klóraði í bakkann með tveim mörkum í röð og lagaði stöðuna í 13-16 en Valsmenn gáfu í aftur og staðan orðin vonlítil 14-22 þegar seinni hálfleikur var hálfnaður. Og enn átti staðan eftir að versna, Valsmenn náðu tíu marka forskoti 16-26 og 17-27 áður en heimamenn náðu að laga stöðuna örlítið þannig að sigur Valsmanna varð á endanum sjö mörk, 21-28.
Einhvernveginn virtust heimamenn algjörlega missa trúna á sjálfa sig og verkefnið í upphafi seinni hálfleiks eftir að hafa sýnt fína baráttu og leik í þeim fyrri. Nýliðinn Nicklas Selvig var eini maðurinn sem hélt haus og gerði fína hluti í sóknarleiknum og verðskuldar fyllilega að vera valinn maður Akureyrarliðsins í leiknum.
Nicklas Selvic búinn að finna glufu á Valsvörninni
Mörk Akureyrar: Nicklas Selvig 6, Heiðar Þór Aðalsteinsson 4, Kristján Orri Jóhannsson 4 (1 úr víti), Sigþór Árni Heimisson 3, Heimir Örn Árnason 2 og Þrándur Gíslason 2.
Þrír markverðir komu við sögu, Tomas varði 6 skot, Hreiðar Levy 3 (1 vítakast) og Bjarki Símonarson 1.
Mörk Vals: Geir Guðmundsson 6, Ómar Ingi Magnússon 5, Elvar Friðriksson 4, Guðmundur Hólmar Helgason 4, Kári Kristján Kristjánsson 3, Finnur Ingi Stefánsson 2, Vignir Stefánsson 2, Atli Már Báruson og Sveinn Aron Sveinsson 1 mark hvor.
Hlynur Morthens varði 14 bolta í marki Vals.
Bikardraumur Akureyrar er þar með úr sögunni þetta árið en næsta verkefni liðsins er erfiður útileikur gegn Aftureldingu, fimmtudaginn 12. febrúar. Þá verður leikin 18. umferð Olís-deildarinnar og að henni lokinni kemur í ljós hvernig lokahluti deildarkeppninnar raðast. |
Úrvalsdeild karla
Senda skilaboð
Vefur KA
Vefur Þór
Fréttaleit
Þú flettir milli frétta með örvalyklunum eða smellir á bláu örvarnar!