Lokaleikurinn í deildinni er á morgun

Það er komið að lokaumferðinni í Olís Deild karla þetta tímabilið. Þó úrslitin á toppi og botni deildarinnar séu ráðin er ennþá mikil spenna fyrir miðju þar sem barist er um sæti áður en úrslitakeppnin hefst.

Akureyri mætir í Austurberg og mætir þar liði ÍR sem situr í 3. sæti deildarinnar. ÍR-ingar voru magnaðir fyrir áramót og voru í baráttu um toppsætið en þeim hefur gengið brösuglega eftir áramót og reyna nú að verja 3. sætið í deildinni.

Akureyri var á miklu skriði í deildinni þegar kom að brotlendingunni gegn FH í síðustu umferð. Sigri Akureyri á morgun tryggir liðið sér 6. sætið en gæti stokkið upp í 5. sætið ef Haukar misstíga sig. Með tapi gæti hinsvegar ÍBV farið upp fyrir okkar menn og Akureyri því endað í 7. sæti.

Hér er staðan í deildinni fyrir lokaumferðina:

Nr.	Félag	Leikir	U	J	T	Mörk	Hlutfall	Stig		-
1.	Valur	26	20	2	4	709 : 611	98	42	:	10
2.	Afturelding	26	18	3	5	665 : 600	65	39	:	13
3.	ÍR	26	13	4	9	706 : 681	25	30	:	22
4.	FH	26	14	2	10	686 : 664	22	30	:	22
5.	Haukar	26	10	6	10	645 : 610	35	26	:	26
6.	Akureyri	26	11	3	12	627 : 634	-7	25	:	27
7.	ÍBV	26	10	3	13	667 : 664	3	23	:	29
8.	Fram	26	9	1	16	589 : 682	-93	19	:	33
9.	Stjarnan	26	7	3	16	651 : 696	-45	17	:	35
10.	HK	26	4	1	21	635 : 738	-103	9	:	43

Leikirnir í lokaumferðinni:
ÍR - Akureyri, Austurberg klukkan 19:30
FH - ÍBV, Kaplakriki klukkan 19:30
Haukar - HK, Ásvellir klukkan 19:30
Fram - Stjarnan, Safamýri klukkan 15:30
Valur - Afturelding, Hlíðarendi klukkan 15:30

Akureyri og ÍR hafa mæst tvisvar í vetur, í fyrri leik liðanna í Austurbergi voru ÍR-ingar betri aðilinn og sigruðu 32-28.
Akureyri lék hinsvegar mun betur þegar liðin mættust fyrir norðan en eftir að Akureyri hafði leitt nær allan leikinn tókst ÍR-ingum að stela stigi og jafntefli 23-23 varð niðurstaðan.

Það eru töluverð tengsl á milli liðanna. Í ÍR eru tveir leikmenn sem hafa leikið fyrir Akureyri en það eru þeir Bjarni Fritzson sem er markahæsti leikmaðurinn í sögu Akureyrar og Garðar Már Jónsson sem er ungur hornamaður. Með Akureyri leika hinsvegar þrír leikmenn sem hafa spilað fyrir ÍR. Ingimundur Ingimundarson og Hreiðar Levý Guðmundsson eru uppaldir í ÍR og þá lék Halldór Logi Árnason einnig með liðinu þegar hann var búsettur fyrir sunnan.



Það eru ágætis líkur á að þessi lið muni mætast í úrslitakeppninni en eins og staðan er í deildinni núna munu þau mætast. Það eru ýmsar stöður sem geta komið upp eftir lokaumferðina og bíðum við spennt eftir að sjá hvernig fer. Við hvetjum að sjálfsögðu alla til að mæta í Austurbergið og hvetja okkar lið til sigurs!