Viðtöl eftir leik Akureyrar og FH


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Andri Snær, Tomas og Halldór Logi voru teknir tali eftir leikinn		20. nóvember 2015 - Akureyri handboltafélag skrifar Viðtöl eftir leik Akureyrar og FH Þeir Einar Sigtryggsson og Stefán Guðnason stóðu fréttamannavaktina fyrir sína fjölmiðla í gærkvöldi á leik Akureyrar og FH. Viðtöl þeirra við leikmenn og þjálfara eftir leikinn fara hér á eftir. Í lokin eru stutt viðtöl við þjálfarana Sverre og Halldór úr kvöldfréttum RÚV í gær. Einar Sigtryggsson ræddi við fyrirliða Akureyrar, Andra Snæ Stefánsson og leggur þar út af ummælum Heiðars Þórs Aðalsteinssonar um Andra Snæ eftir síðasta heimaleik. Þar á eftir ræðir Einar við Halldór Jóhann Sigfússon, þjálfara FH. Andri Snær: Lukkudýrið og tískukóngurinn Fyrirliði Akureyringa í handboltanum, Andri Snær Stefánsson, fékk væna sneið frá félaga sínum eftir síðasta heimaleik liðsins. Sagði Heiðar Þór Aðalsteinsson að Andri Snær væri hálfgert lukkudýr þar sem hann væri alltaf á bekknum. Annað kom á daginn í kvöld þegar Akureyri lagði FH í mjög skrautlegum leik fyrir norðan, 25:20. Fyrirliðinn sem menn voru farnir að kalla Lukka kom sterkur inn af bekknum og kláraði leikinn með stæl. En hvað hafði hann að segja um sjálfan leikinn? „Við sýndum virkilega flottan leik lengi vel en svo fór þetta að hiksta. Sóknarleikurinn varð hægur og erfiður og þeir komust óþægilega nálægt okkur. Þá kom Tomas inn og kláraði þetta fyrir okkur með frábærri markvörslu á mikilvægum augnablikum. Það var gaman fyrir mig að koma inn og spila en það er samt ekki aðalatriðið. Við drulluðum upp á bak í síðasta leik gegn Haukum en sýndum karakter að koma svona stemmdir til leiks þremur dögum síðar gegn liði sem er á svipuðu róli og við. Nú loks erum við að komast á þær slóðir sem við viljum vera á en þurfum að safna miklu fleiri stigum. Þetta er grilluð deild og pakkinn er þéttur og þess vegna þarf að sýna greddu í hverjum einasta leik. Við þurfum að vera í standi hvert einasta augnablik.“ Andri Snær leysir inn á línuna og skorar eitt af fjórum mörkum sínum Um lukkudýrs-stimpilinn sagði Andri Snær: „Ég og tískukóngurinn (Heiðar Þór) höfum verið hornapar Akureyrarliðsins meira og minna í tíu ár. Við erum góðir vinir og eigum það til að skjóta hvor á annan. Þetta var virkilega gott glens hjá honum og maður verður bara að brosa og hafa gaman að þessu. Maður eyðir það miklum tíma í handboltann að það þýðir ekkert annað. Kappinn gefur mér oft góð ráð varðandi fataval og klæðaburð. Nú er ég alltaf kasual í klæðaburði og það er Heidda að þakka.“ Halldór Jóhann: Vinnur ekki leik með 22 tapaða bolta Halldór Jóhann Sigfússon, þjálfari FH, var lengi í klefanum með sínum mönnum eftir 25:20 tap gegn Akureyri í Olísdeild karla í handbolta í kvöld. Fengu menn hans góða messu en á eftir var Halldór hinn rólegasti þegar mbl.is fékk hann í viðtal. „Þetta var bara lélegur leikur hjá okkur. Fyrstu 40 mínúturnar var liðið að spila illa og staðan 19:10. Þá loks tókum við okkur saman og í raun er grátlegt að hafa komist svona nálægt þeim, bara til að klúðra færum og boltum í restina. Við áttum séns á að minnka muninn í tvö mörk, vorum komnir með tak á þeim en því miður þá gekk það ekki. Það segir sig sjálft að lið vinnur ekki leik í efstu deild með 22 tapaða bolta. Við erum bara allt of góðir til að spila svona illa. Það má segja að Akureyrarliðið hafi mætt tilbúið í leikinn og þeir voru bara ferskari lengi vel.“ Halldór Jóhann reynir allt hvað hann getur til að rífa sína menn upp Um markvörslu Ágústar Elís sagði Halldór Jóhann „Hann var að verja ágætlega í fyrri hálfleiknum en einhverjir boltar láku samt inn. Loks þegar kom einhver vörn hjá okkur tók hann við sér og við áttum séns. Við erum í ákveðnum erfiðleikum, svipað og Akureyringar, en það er ljóst að ýmislegt þarf að laga fyrir næsta leik gegn Víkingum. Þá byrjar bara sama baráttan og við verðum að framkvæma sóknarleikinn betur en í síðustu leikjum. Við höfum æft hann aftur og aftur en það er athyglisvert að það er ekki að skila sér nógu vel,“ sagði Halldór að skilnaði, að vonum svekktur með uppskeru kvöldsins. Á vísir.is eru viðtöl Stefáns Guðnasonar við Tomas Olason markvörð Akureyrar, Halldór Loga Árnason leikmann Akureyrar sem reyndar lék ekki nema í 45 sekúndur í leiknum og loks Árna Stefán Guðjónsson aðstoðarþjálfara FH. Tomas: Allir að kasta sér á lausu boltana Tómas Ólason átti frábæra innkomu í mark Akureyrar í seinni hálfleik og lagði sitt lóð svo sannarlega á vogarskálina. Meðal annars minnti hann mikið á hálf-landa sinn, frægan danskan markvörð í knattspyrnu, þegar hann kastaði sér á lausan bolta sem stefndi út af með tilþrifa mikilli skutlu. „Það voru bara allir að kasta sér á lausu boltana, þannig að ég þurfti bara líka að gera það. Ég er ekki viss um að þetta hefði verið horn hefði ég ekki náð honum en ég vildi ekki taka neina sénsa,“ sagði Tomas brosmildur. „Baráttan í liðinu í dag var frábær, Andri og Kristján (rósin) voru til dæmis báðir nýbúnir að kasta sér á bolta og Sissi kastaði sér á FH-ing í sókninni á undan, af hverju má ég ekki gera það líka? Tomas í miklum ham og skutlar sér á boltann Við vorum bara allir frekar æstir í sigur og sýndum það í verki. Þetta var flottur sigur hjá liðinu og gaman að geta hjálpað til.“ Tómas hefur lítið spilað á síðustu vikum en það virtist ekki koma að sök í dag. „Hreiðar er búinn að vera hreint út sagt frábær það sem af er vetri þannig að eðlilega hef ég lítið verið að spila. Það var virkilega gott að geta komið sterkur inn í dag og hjálpað þannig liðinu.“ Tomas Olason maður Akureyrarliðsins í leiknum Halldór Logi: Dómarar hafa lítinn tíma til að taka ákvörðun Aðaldalsbuffið, Halldór Logi Árnason, setti vafasamt met fyrir Akureyri Handboltafélag í kvöld. Aldrei hefur leikmaður verið jafn fljótur að næla sér í rautt spjald í sögu Akureyrar Handboltafélags en það tók hann aðeins rúmar 40 sekúndur í kvöld. Raunar væri fróðlegt að vita hvort það hafi gerst áður hér á landi. Rauða spjaldið kom eftir árekstur við Einar Rafn Eiðsson leikmann FH-inga. „Ég veit það ekki, mér fannst þetta alls ekki vera rautt spjald. Það virðist eins og það sé einhver lína að gefa sem flest rauð spjöld þennan vetur. Ég snéri bakinu í Einar og var að passa línumanninn þegar Einar klessir allt í einu inni í bakið á mér. Dómararnir mátu þetta sem svo að ég hefði gefið honum olnbogaskot og þeim til varnar gerist þetta hratt og erfitt fyrir þá að meta þetta á svona stuttum tíma. Ég ætla að fá að sjá þetta samt á videoi áður en ég tek einhverja alvöru afstöðu gagnvart þessu,“ segir Halldór. Halldór Logi Árnason fær rauða spjaldið eftir 46 sekúndna leik „En ef ég horfi á björtu hliðarnar á þessu öllu saman þá er alltaf gaman að eiga met. Ég efa það stórlega að ég verði markahæsti leikmaðurinn í sögu Akureyrar eða leikjahæsti. Ég á þó allavegana þetta og vonandi verður það ekki tekið af mér á næstunni.“ Árni Stefán: Nóg eftir af mótinu Ef frá eru taldir Ágúst Elí Björgvinsson og Ásbjörn Friðriksson hjá FH voru FH-ingar lengst af að spila langt undir getu. Ágúst og Ásbjörn virtust vera þeir einu sem héldu haus þegar illa gekk. Hinn brosmildi Árni Stefán Guðjónsson, aðstoðarþjálfari FH var því eðlilega ósáttur eftir leik. „Menn mættu bara ekki til leiks. Við spiluðum af eðlilegri getu í kannski 20 mínútur, vondi kaflinn okkar var bara allt of langur í dag og það má ekki gegn svona sterku liði eins og Akureyri er. Við byrjuðum mótið illa en erum búnir að vera að bæta okkur mikið í síðustu leikjum,“ segir Árni Stefán. „Þó úrslitin í síðasta leik hafi ekki verið okkur hagstæð var spilamennskan góð. Því var ekki að skipta í dag. Það er þó ekkert stress, það er nóg eftir og við vissum alveg að við myndum ekki spila alla leiki óaðfinnanlega. Þannig að nú er það bara næsti leikur, þetta er langhlaup en ekki sprettur. Við höldum bara áfram að vinna í okkar leik og bæta okkur.“ FH situr nú í áttunda sæti deildarinnar einu stigi fyrir ofan ÍR sem situr í því níunda. Hins vegar eru aðeins tvö stig í ÍBV sem er í því fimmta þannig að það er ekkert orðið útséð með hvernig veturinn þróast hjá FH. „Pakkinn er náttúrulega orðinn gríðarlega þéttur. Hver einasti leikur orðinn virkilega dýrmætur þannig að við grátum þessi tvö stig en við erum ennþá inn í pakkanum þannig að við höldum bara ótrauðir áfram.“ Þjálfarar FH þeir Halldór Jóhann Sigfússon og Árni Stefán Guðjónsson Að lokum er hér sjónvarpsupptaka af rauða spjaldinu umdeilda en í lokin á því eru viðtöl við þjálfarana Sverre Andreas Jakobsson og Halldór Jóhann Sigfússon sem birtust í kvöldfréttum RÚV í gærkvöldi.
Fletta milli frétta	Til baka Senda á Facebook