Nýtt fyrir Sverre að fylgjast með EM í sjónvarpinu

„Það verður örugglega stórfurðulegt að fylgjast bara með mótinu hér heima á Íslandi - að fara aldrei niður í morgunmat hjá lobbýinu og sofa ekki við hliðina á Kára eða einhverjum þennan mánuðinn,“ sagði Sverre Jakobsson hlæjandi, þegar Morgunblaðið sló á þráðinn til hans í aðdraganda EM í Póllandi.

Þetta verður fyrsta stórmót íslenska landsliðsins án Sverres frá því að Alfreð Gíslason valdi hann í liðið fyrir heimsmeistaramótið í Þýskalandi 2007. Þó að þessi magnaði varnarmaður hafi nú lagt skóna á hilluna, og muni láta sér nægja að fylgjast með EM í sjónvarpi heima á Akureyri, þá er hann litlu síður spenntur fyrir mótinu en fyrrverandi liðsfélagar hans í landsliðinu:

„Það kom bara fiðringur í mann strax í lok ársins. Maður upplifir þetta eflaust aðeins sterkar en aðrir landsmenn. Eftir á að hyggja voru stórmótin það skemmtilegasta við ferilinn. Það var svo rosalega margt skemmtilegt við þetta. Eins og menn hafa bent á eru þetta auðvitað ansi mörg stórmót, en þegar á hólminn var komið var þetta alltaf jafnskemmtilegt. Auðvitað gengu mótin mismunandi, en þetta var eitthvað sem maður hlakkaði alltaf til,“ sagði Sverre. Morgunblaðið bað hann að lýsa aðeins lífinu á stórmóti eins og EM.

Ekki hið ljúfa líf á hótelinu

Góðum sigri með landsliðinu fagnað með Róberti Gunnarssyni

Leikmenn verja 2-3 vikum saman á hóteli á stórmóti, eftir að hafa verið saman í 2 vikur við æfingar, og þegar illa gengur hlýtur að geta verið erfitt að halda góðum anda í hópnum þegar samneytið er svona mikið yfir svo langan tíma, eða hvað?

„Maður hefur lent í því að vera með bakið upp við vegg, svartnættið eitt virðist framundan og aðeins einn leikur getur breytt því. Dæmi um þetta var 2010 eftir að við gerðum jafntefli við Austurríki í öðrum leik og urðum að vinna Dani til að komast í milliriðil, eða þegar við unnum Frakka á HM 2007. Þegar illa gengur þurfa menn bara að standa saman, og það er hlutverk leikmanna og starfsfólksins í kringum liðið að vinna sig út úr svona mótlæti. Það tókst ekki nægilega vel á HM í Katar, en það hefur einkennt íslensk landslið að það hefur alltaf tekist að halda liðsheildarpakkanum nokkuð góðum og menn sökkva ekki dýpra en eðlilegt er. Það er samt alltaf áskorun að vinna sig út úr erfiðri stöðu,“ sagði Sverre.

Enginn í símann strax eftir leik

„Það er misjafnt hve mikið menn fylgjast með umræðunni og maður mun eflaust skoða þetta mun meira núna eftir að maður er hættur. Sem leikmaður reyndi maður að einbeita sér alfarið að verkefninu. En með tilkomu þessara samfélagsmiðla verður umræðan sterkari og erfiðara að ýta öllu frá sér. Þá áttar maður sig kannski á því hvað það eru margir þjálfarar á landinu, eftir hvern einasta leik,“ sagði Sverre hlæjandi. „Maður tekur eftir því að það kemur ýmislegt misgáfulegt frá mönnum, sem margir virðast ekki skilja leikinn og eru að skammast út í ákveðna leikmenn eða liðið og átta sig ekki á því að kannski var verið að fara eftir ákveðnu uppleggi, sem kannski gekk ekki upp. En menn hugsuðu ekkert um þetta og það hoppaði enginn í símann til að lesa fréttir eða skoða Twitter og Facebook eftir leik,“ bætti hann við.

En hvernig líst Sverre á íslenska liðið í dag og hvaða væntingar er hægt að gera til þess?

„Mér líst vel á liðið. Það er búinn að vera fínn andi í kringum það og það er eins og menn hafi reynt að núllstilla allt eftir HM í Katar. Menn voru auðvitað ósáttir við það mót og kannski líka aðdragandann að því eftir að hafa komið bakdyramegin inn. Það var aldrei sérstaklega jákvæð umræða í kringum það mót, sem endurspeglaðist kannski í því að við náðum okkur aldrei almennilega á strik. Þar spilaði þó margt inn í, eins og meiðsli og fleira. Núna virðast menn hafa hrist þetta af sér og mér sýnist allir rosalega einbeittir í að skila góðu verki. Þess vegna er ég bjartsýnn.“

Hafa fundið ákveðið samband

„Mér finnst vörnin líta vel út. Vignir og Bjarki hafa fundið ákveðið samband sín á milli sem ég er viss um að þjálfararnir leggja áherslu á að halda. Þeir hafa spilað mikið saman og það er gríðarlega mikilvægt þegar í svona mót kemur. Bjarki er að fara á sitt þriðja stórmót og Vignir hefur farið á mörg, og þetta hjálpar til. En það þarf einn ef ekki tvo til viðbótar, til að spila í miðjublokkinni. Tandri og Guðmundur Hólmar hafa verið að spila þarna og eru nokkuð jafnir. Guðmundur kom óvænt inn í haust og stóð sig vel, en það er auðvitað ekki það sama að spila svo á svona stórmóti. En ég treysti honum til góðra verka. Tandri hefur verið lengur í landsliðinu og staðið sig vel í Svíþjóð í nokkurn tíma, svo hann er ekki síður góður kostur,“ sagði Sverre.

Ljóst er að góður varnarleikur gæti skilað Íslandi afar langt á EM:

„Menn hafa áhyggjur af varnarleiknum allan ársins hring og það er kannski ekkert skrýtið því það byggist svo mikið á honum. Án hans fá menn ekki markvörslu og öll þessi eitruðu hraðaupphlaupsmörk frá Guðjóni Val,“ sagði Sverre, sem eins og fyrr segir er bjartsýnn á gott gengi Íslands í Póllandi.

Hér má sjá nokkur varnartilþrif hjá okkar manni

Hvað heldur Aron vel út?