Warning: Undefined array key "frettanr" in /web/akhandadmin/public_html/index.php on line 15 Erfið staða eftir eins marks tap gegn Fram - Akureyri Handboltafélag
Dómarar: Anton Gylfi Pálsson og Jón Karl Björnsson
Umfjöllun
Tengdar fréttir
Andri Snær og Sverre í viðtölum eftir Framleikinn
27. mars 2017 - Akureyri handboltafélag skrifar
Viðtöl eftir leik Akureyrar og Fram
Skiljanlega voru Akureyringar ekki mjög glaðbeittir eftir tapleikinn gegn Fram á laugardaginn en Framarar skiljanlega kátari. Blaðamenn mbl.is og visir.is ræddu við menn eftir leikinn og fara viðtölin hér á eftir. Einar Sigtryggsson á mbl.is ræddi við þjálfarana Sverre Andreas Jakobsson og Guðmund Helga Pálsson.
Sverre: Vorum klaufar í seinni hálfleik
Sverre Andreas Jakobsson, þjálfari Akureyringa í Olís-deildinni í handbolta, þurfti að sætta sig við tap gegn Fram í dag í algjörum lykilleik í fallslag deildarinnar. Fram skildi Akureyringa eftir á botninum með 27:26-sigri í leik liðanna í dag og þurfa norðanmenn helst að vinna lokaleiki sína tvo til að hanga í deildinni. Sverre var spurður út í leikinn og framhaldið.
Útlitið er orðið svart hjá ykkur eftir þennan leik sem þið hefðuð þurft að vinna. „Síðustu leikir hafa kallað á að ná í einhver stig nú þegar dregur að endalínunni. Við fáum ekkert fleiri sénsa. Þessi leikur var eins og við máttum búast við, jafn en niðurstaðan er okkur vonbrigði. Við ætluðum að klára þetta og teljum okkur hafa verið klaufa á tímabili í seinni hálfleiknum sem gerði þetta erfitt.“
Eftir góða byrjun í seinni hálfleik þá kom slæmur kafli þar sem staðan breyttist úr 19:16 fyrir Akureyri í 25:22 fyrir Fram. Hvað gerðist á þessum tímapunkti? „Við vorum á réttri leið og að spila eins og við ætluðum okkur. Svo bara blokkeraðist liðið í heild sinni og menn fundu fyrir meiri pressu. Við hættum að njóta þess að vera bara við og sóknarleikurinn fór illa. Þessi sex marka sveifla fór með okkur.“
Þið eigið tvo leiki eftir og hafið ekki lagt árar í bát? „Nei alls ekki. Þetta er bara sárt. Við erum allir keppnismenn og erum búnir að leggja mikið á okkur þótt við séum ekki alltaf að fá verðlaun fyrir það. Nú þurfum við að spýta í lófana. Það eru þessir tveir leikir og við höldum í vonina um að úrslit annarra leikja falli líka með okkur. Við sjáum bara hvað gerist og verðum tilbúnir í það sem eftir er.“
Það er ekki óskastaða að þurfa að spila við ÍBV í Eyjum í næsta leik. „Leikirnir við þá hafa verið jafnir og við getum tekið það með okkur í undirbúninginn. En eins og ég segi þá verðum við að vera tilbúnir í þann slag og svo gæti lokaleikurinn í Garðabænum verið hreinn úrslitaleikur fyrir bæði liðin. Við verðum bara að sjá“ sagði Sverre, óvenju brúnaþungur.
Sverre og Ingimundur fara yfir leik sinna manna
Guðmundur Helgi: Maður nötrar ennþá
Guðmundur Helgi Pálsson var svo sannarlega glaður en nokkuð spenntur eftir að hans menn í Fram höfðu unnið Akureyri með eins marks mun í dag í Olísdeild karla í handbolta í dag. Sigur Fram var lífsnauðsynlegur í fallbaráttunni og fer langt með að halda þeim í deildinni.
Þetta var frábær sigur hjá ykkur. „Algjörlega stórkostlegur, maður nötrar ennþá og er að átta sig á þessu. Við gerðum þetta óþarflega spennandi í blálokin. Þetta var bara hörkuleikur á móti hörkuliði. Bæði lið hafa verið að spila vel og taka sigra upp á síðkastið. Mér fannst þetta ekki vera eins og botnslagur.“
Akureyringar voru að síga framúr þegar þið tókuð leikhlé sem breytti öllu. „Við breyttum vörninni okkar og hún small algjörlega eftir þetta. Hún var alveg búin að vera ágæt en síðasta hluta leiksins var hún bara frábær. Þegar þeir komu inn með sjöunda manninn í sóknina þá þurftum við að vera hreyfanlegri og eftir það þá náðum við að loka vel á þá.“
Þannig að það voru Akureyringar sem komu ykkur í gang með þessu herbragði sínu. „Ég segi það nú ekki en jú, jú, þetta kveikti einhvern neista hjá okkur.“
Guðmundur Helgi var líflegur á hliðarlínunni
Lykilmenn Framliðinu eru afar ungir, það eru markvörðurinn Viktor Gísli Hallgrímsson og skytturnar Arnar Birkir Hálfdánsson og Þorsteinn Gauti Hjálmarsson. „Viktor Gísli er sextán ára, verður sautján í júlí. Arnar Birkir er 23 ára ásamt öðrum leikmanni og svo er Þorsteinn nýkominn upp úr 2. flokki. Þetta er rosalega ungt lið og gaman að þjálfa það.“
Það reiknuðu ekki margir með því að þið gætuð spjarað ykkur í deildinni. „Það er alveg rétt. Við misstum marga leikmenn, jafnvel rétt fyrir mót og þurftum að smala í lið. Svo erum við með mikið af heimaöldum strákum. Það þurfti bara að byggja á þeim. Ég legg mikla áherslu á það að hafa gaman og ég segi strákunum að þeir séu ekki bara að spila fyrir sjálfa sig heldur fyrir félagið.“
Þið eruð ekki alveg sloppnir við fall þrátt fyrir tvo sigra í röð. „Nei, þetta er ekki búið. Það er allt opið og það geta allir unnið alla. Þetta er yfirleitt spurning um hugarfar, hvernig menn mæta til leiks. Það er allt hægt og nóg eftir,“ sagði Guðmundur Helgi að skilnaði, greinilega afar stoltur af piltunum sínum.
Skiptum þá yfir í viðtöl Ólafs Hauks Tómassonar á visir.is en hann ræddi við fyrirliða Akureyrar, Andra Snæ Stefánsson og Guðmund Helga, þjálfara Fram.
Andri Snær: Óþolandi að kasta þessu frá okkur
„Ég er hundsvekktur,“ sagði Andri Snær Stefánsson, fyrirliði Akureyrar eftir leikinn en Akureyringar eru í bölvuðu basli í botnsæti deildarinnar eftir tapið þegar skammt er eftir af mótinu.
„Þetta var gífurlega mikilvægur leikur og við því miður vorum ekki nógu klókir síðustu tuttugu mínúturnar sem gerði útslagið. Við vorum með þennan leik, vorum tveimur mörkum yfir þegar það voru tuttugu mínútur eftir og stemmingin með okkur. Það er algjörlega óþolandi að kasta þessu svona frá okkur“.
Akureyri er nú algjörlega með bakið upp við vegg og þurfa nauðsynlega að ná stig í næsta leik sem er gegn ÍBV á útivelli ef þeir ætla sér að eiga einhverja von fyrir lokaleikinn gegn Stjörnunni. „Nú erum við mjög svekktir og súrir og verðum að rífa okkur upp. Við verðum að berjast, það eru enn tveir leikir eftir og við verðum að hafa trú á því að við getum unnið Eyjamenn,“ sagði Andri Snær, sem fór fyrir sínum mönnum í dag og skoraði tíu mörk.
Andri Snær skorar eitt af tíu mörkum sínum í leiknum
Guðmundur Helgi: Taugatrekkjandi leikur
„Þetta skiptir gríðarlegu máli, oft í vetur hafa verið „fjögurra stiga“ leikir en þetta var svo sannarlega einn fimm eða sex stiga leikur með því að komast aðeins frá Akureyri, sem voru frábærir í dag. Þetta var frábær leikur fyrir áhorfendur og taugatrekkjandi fyrir þjálfara,“ sagði Guðmundur Helgi Pálsson, þjálfari Fram eftir leikinn.
Arnar Birkir Hálfdánsson fór fyrir liði Fram í sókninni og var markahæstur í þeirra liði. Guðmundur var mjög ánægður með framlag hægri skyttunnar í dag. „Arnar Birkir stóð upp úr og var frábær. Við vissum að þetta yrði þolinmæðisverk enda allt undir hjá Akureyri, við vissum að þetta yrði jafnt allan tímann og ég hefði alveg viljað hafa aðeins meira forskot þarna í restina en við ákváðum greinilega að gera þetta smá spennandi,“
„Ég sagði fyrir sex leikjum síðan að við ætlum að ná í öll stig sem við getum, við komum inn í alla leiki til að vinna þá og svo verður þetta talið saman í lokin. Ég hef hellings trú á þessum drengjum og það er allt hægt ef þeir hafa trú á því sem við gerum,“ sagði hann og hélt áfram:
„Það er eitt í þessu, við höfum spilað mjög vel en tapað með einu marki, gert jafntefli en við spilum vel og það er stígandi í liðinu,“ sagði Guðmundur í sigurvímu eftir leikinn og var mjög ánægður með framlag sinna manna í dag.
Sverre ætlar sér sigur í dag!
25. mars 2017 - Akureyri handboltafélag skrifar
Akureyri - Fram í beinni útsendingu
Akureyri og Fram mætast í KA-Heimilinu í dag klukkan 16:00. Frítt er inn á leikinn og þá verða gefnar pylsur og gos. Gríðarlega mikið er í húfi en liðin sitja í tveimur neðstu sætunum fyrir leikinn og þurfa nauðsynlega á stigunum að halda.
Við hvetjum að sjálfsögðu alla til að mæta en ef þú kemst ómögulega á leikinn þá bendum við á hlekkinn hér að ofan til að sjá leikinn beint.
Til að hita upp fyrir leikinn þá mælum við með meðfylgjandi myndböndum til að koma fólki í gírinn, áfram Akureyri!
Að sjálfsögðu gefum við allt í leikinn!
22. mars 2017 - Akureyri handboltafélag skrifar
Frítt á Fram-leikinn – allir fá gos og pylsur
Það er svo sannarlega hægt að tala um algjöran úrslitaleik þar sem allt er undir þegar Akureyri tekur á móti Fram í Olís deildinni á laugardaginn. Liðin sitja í tveim neðstu sætum deildarinnar og aðeins eitt stig sem skilur liðin að. Hafi einhverntíma verið nauðsynlegt að stuðningsmenn liðsins komi og taki þátt í baráttunni þá er það einmitt núna.
Frítt á leikinn – gos og pylsur í boði fyrir áhorfendur
Þar sem þetta er síðasti heimaleikur Akureyrar í Olís deildinni á þessu tímabili verður frítt inn á leikinn fyrir alla sem vilja og þar að auki verður boðið upp á gos og pylsur á meðan birgðir endast.
Akureyri og Fram hafa mæst tvisvar í deildinni í vetur, fyrri leikurinn sem var heimaleikur Fram var æsispennandi þar sem Fram vann að lokum eins marks sigur. Seinni leikurinn var í desember hér fyrir norðan og óhætt að segja að afleit byrjun leiksins hafi gert útaf við vonir Akureyrarliðsins um að hefna fyrir fyrsta leikinn og lauk leiknum með öruggum sigri Fram. Nú fær liðið annað tækifæri til að takast á við Fram og það er næsta víst að heimamenn ætla ekki að brenna sig á sama soðinu aftur.
Við heitum því á alla sem vettlingi geta valdið til að troðfylla KA heimilið og styðja strákana með öllum tiltækum ráðum, það kostar sem sé ekkert inn á leikinn og hressandi pylsa og gos til að gefa mönnum orku í átökin.
Leikurinn hefst klukkan 16:00 á laugardaginn og um að gera að mæta tímanlega.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Myndband frá leiknum 
Textalýsing frá leiknum
Tölfræði leiksins 
Einar Sigtryggsson á mbl.is ræddi við þjálfarana Sverre Andreas Jakobsson og Guðmund Helga Pálsson.
Sverre og Ingimundur fara yfir leik sinna manna
Guðmundur Helgi var líflegur á hliðarlínunni
Skiptum þá yfir í viðtöl Ólafs Hauks Tómassonar á visir.is en hann ræddi við fyrirliða Akureyrar, Andra Snæ Stefánsson og Guðmund Helga, þjálfara Fram.
Andri Snær skorar eitt af tíu mörkum sínum í leiknum
Þar sem þetta er síðasti heimaleikur Akureyrar í Olís deildinni á þessu tímabili verður frítt inn á leikinn fyrir alla sem vilja og þar að auki verður boðið upp á gos og pylsur á meðan birgðir endast.
Senda á Facebook