Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
    Fréttir                       Þú flettir milli frétta með örvalyklunum eða smellir á bláu örvarnar! 

Líkt og fyrir átta árum skiptir öllu að standa sig í 4 liða úrslitunum









17. apríl 2010 - Akureyri handboltafélag skrifar

Úrslitakeppnin 2002: annar hluti, 4 liða úrslitin

Við höldum áfram að rifja upp stemminguna og fjörið sem fylgir úrslitakeppnum. Komið er að 4 liða úrslitunum árið 2002 en þar áttust við Haukar og KA annars vegar og í hinni viðureigninni Valur og Afturelding.

Morgunblaðið hafði sem sérlegan sérfræðing Heimi Ríkharðsson, núverandi aðstoðarþjálfara Vals en á þessum tíma þjálfaði Heimir lið Fram.

DV-Sport fékk hins vegar Magnús Agnar Magnússon, fyrirliða Gróttu/KR, til að spá í baráttuna í undanúrslitunum.

Við birtum hér spádóma Heimis og Magnúsar um viðureign Hauka og KA svo og viðtöl Morgunblaðsins við þjálfara liðanna, þá Viggó Sigurðsson og Atla Hilmarsson um undirbúning liðanna fyrir fyrsta leikinn.

Þriðjudaginn 23. apríl, 2002
Heimir Ríkharðsson spáir í spilin fyrir undanúrslit Íslandsmóts karla

Barist fram á síðustu sekúndu

Átta liða úrslitum Íslandsmóts karla lauk á föstudaginn þegar Haukar, Valur, Afturelding og KA unnu sín einvígi gegn FH, Þór, ÍR og Gróttu/KR í tveimur leikjum og er þetta í fyrsta skipti í sögu úrslitakeppninnar sem ekki kemur til oddaleikja í einhverju einvígi í úrslitakeppninni. Flautað verður til leiks í fjögurra liða úrslitum annað kvöld þegar Íslandsmeistarar Hauka taka á móti KA á Ásvöllum og Afturelding sækir Val heim á Hlíðarenda. Heimir Ríkharðsson, þjálfari Fram og spámaður Morgunblaðsins, segist reikna með að það komi í hlut „frændanna“ Hauka og Vals að mætast í úrslitarimmu um Íslandsmeistaratitilinn, en framundan séu gífurlega jafnir og spennandi leikir í undanúrslitum.

Haukar og KA mættust í fimm leikja einvígi um Íslandsmeistaratitilinn fyrir ári og var þar um jafnar og skemmtilegar viðureignir að ræða. Heimir segist reikna með að liðin taki upp þráðinn þar sem frá var horfið í fyrra þrátt fyrir að örlítlar breytingar hafi orðið á liðsskipan. Leikir liðanna í vetur voru jafnir, einkum þó viðureignin á Ásvöllum þar sem þau skildu með skiptan hlut. „Ég er ekki vafa um að Haukarnir hafa betur og geta þess vegna unnið einvígið í tveimur leikjum,“ segir Heimir. „KA-liðið er hins vegar alveg nógu sterkt til að klóra í bakkann og vinna að minnsta kosti einn leik. Ég sá viðureign liðanna í vetur á Ásvöllum sem endaði með jafntefli og þá lék KA-liðið mjög skemmtilega og árangursríka vörn í síðari hálfleik sem skilaði því öðru stiginu. En þetta verða mjög jafnar viðureignir og það má ef til vill lítið út af bera til þess að úrslit verði á hinn veginn og KA komist áfram, þótt ég telji líkurnar vera Hauka megin,“ segir Heimir og telur að miklu máli skipti fyrir möguleika KA að Egidijus Petkevicius, markvörður, nái sér á strik, en hann hefur átt afar misjafna leiki á keppnistímabilinu.

„Mín spá er að Haukar vinni 2-0, en þetta verða gríðarlega spennandi leikir,“ segir Heimir og telur að Haukum verði ekki alvarlega ógnað í titilvörninni. „Haukar stóðu sig það vel gegn FH og yfirhöfuð í vetur að ég held að KA-liðið verði þeim ekki nein alvarleg hindrun þótt ekki sé loku fyrir það skotið að KA vinni einn leik.“

Meiðsli hafa hrjáð sterka leikmenn Hauka-liðsins, Aron Kristjánsson og Rúnar Sigtryggsson og m.a. lék hinn síðarnefndi ekkert gegn FH á föstudagskvöldið. Heimir segir að mikilvægt sé fyrir Hauka að þessir tveir reynslumiklu menn geti leikið. „Það koma upp vandræði hjá Haukunum ef þeir missa Aron og Rúnar þótt liðið sé vel skipað og hafi marga góða leikmenn innan sinna vébanda.“

Heimir segir ennfremur að það hafi komið sér á óvart eins og fleirum hversu snubbótt einvígin voru í 8-liða úrslitum. „Ég átti von á því að minnsta kosti þrjú einvígjanna færu í þrjá leiki. Mér fannst það vera borðliggjandi þar sem Íslandsmótið var mjög jafnt. Nú verður hins vegar allt annað uppi á teningnum. Í einvígjum Hauka og KA annars vegar og Vals og Aftureldingar hins vegar verður barist fram á síðustu sekúndu í öllum leikjum. Þetta verða hörkuleikir og góð auglýsing fyrir handknattleikinn. Það er aldrei að vita nema óvænt úrslit líti dagsins ljós þótt fyrirfram reikni ég með að Haukar og Valur berjist um Íslandsmeistaratitilinn,“ sagði Heimir Ríkharðsson, þjálfari Fram.


Spá Magnúsar hjá DV-Sport
„Haukar eru með besta lið landsins í dag en KA-menn munu væntanlega leggja höfuðáherslu á að ná að stela fyrsta leiknum líkt og þeir gerðu gegn okkur. Styrkur Haukanna liggur í breiddinni, mikilli reynslu, þrautreyndum þjálfara, góðri umgjörð og hefðinni sem hefur komið í kjölfar góðs árangurs. Það sem getur skemmt fyrir Haukum er að þeir verði of öruggir með sjálfa sig,“ sagði Magnús Agnar.

„Styrkur KA-manna liggur í öflugri 3-2-1 vörn með Jónatan Magnússon fremstan í flokki. Leikmenn eins og Heiðmar Felixson og Egedius Petkevicius hafa verið að spila vel að undanförnu og liðið er ungt og þyrstir í titil. Veikleiki liðsins er lítil breidd og það hversu smávaxið það er.“

„Að öllu jöfnu ættu Haukar að vinna þetta einvígi. Það hefur hins vegar sýnt sig í úrslitunum hjá stelpunum að það getur allt gerst í handboltanum,“ sagði Magnús Agnar. Spá: 2-1 fyrir Hauka.


Viðtal við Viggó Sigurðsson þjálfara Hauka (Mbl. 24. apríl 2002)

Aðeins sigur kemur til greina

„Við þekkjum KA-mennina vel og að góðu einu,“ sagði Viggó Sigurðsson, þjálfari Íslands-, bikar-, og deildarmeistara Hauka. Hann býr sveit sína af kostgæfni undir titilvörnina, en annar áfangi hennar hefst í kvöld þegar Haukar taka á móti KA á Ásvöllum. „Eftir fimm leikja rimmu í fyrravor hafa liðin mæst í tvígang í vetur og úr hafa orðið tveir hörkuleikir og ég vænti þess að framhald verði á,“ sagði Viggó sem lítið vill minnast á undirbúning Haukanna fyrir leikina sem framundan eru.

Undirbúningurinn er okkar leynivopn, en segja má að hann sé í nokkuð föstum skorðum enda er fyrir hendi mikil reynsla í okkar herbúðum vegna leikja sem þessara,“ segir Viggó. „Vinnan á milli leikja er skipulögð og ákveðin og við höfum ekkert breytt út af vananum. Að sjálfsögðu höfum við ekki eytt tímanum í að horfa út í loftið. Við erum tilbúnir í þessa leiki og höfum sýnt það á síðustu árum að við leikum oft mjög vel undir álagi.

KA-liðið er stemmningslið sem er hættulegt í einvígjum, en við höfum hagað undirbúningi okkar á hefðbundinn hátt og erum klárir í bátana þegar ýtt verður úr vör.“

Viggó segir að menn megi ekki einblína á heimaleikjaréttinn og ætla sér eingöngu að vinna þá þótt það sé skylduverk. Það hafi ekki aðstoðað KA í rimmunni um Íslandsmeistaratitilinn að eiga heimleikjarétt í oddaleik.

„Það sem fyrst og fremst ræður úrslitum í þessu einvígi er styrkleiki liðanna og að einbeitingin sé góð auk þess að geta spilað úr þeim spilum sem menn hafa á hendi hverju sinni. Okkar styrkur hefur ekki hvað síst falist í því að við höfum spilað vel undir álagi þegar mikið er undir.“

Átt þú ekki von á meiri mótspyrnu en þið fenguð frá FH í átta liða úrslitum?

„FH-ingar hljóta að hafa valdið sjálfum sér og stuðningsmönnum miklum vonbrigðum. Þeir léku mjög illa og voru okkur tiltölulega auðveld bráð. Ég vænti mun meiri mótspyrnu frá KA-liðinu.“

Viggó segir að einn helsti styrkleiki KA-liðsins sé varnarleikurinn. „KA leikur framliggjandi og góða vörn. Einnig getur liðið leikið flata 6/0 vörn með ágætum. Frammistaða markvarða liðsins hefur hins vegar verið upp og ofan á leiktíðinni. En þegar þessi tvö atriði fara saman, góð vörn og góð markvarsla, er engin launung að KA-liðið er illviðráðanlegt, þá er þetta svo sannarlega topplið, við gerum okkur fullkomlega grein fyrir því og höfum báða fætur á jörðinni.“
Er það markmið ykkar að ljúka einvíginu í tveimur leikjum?
„Ekki endilega. Við erum hins vegar staðráðnir í að vinna heimaleikina, það er lykilatriði. Takist það komumst við áfram í næstu umferð. En svo sannarlega höfum við ekkert á móti því að vinna nyrðra. Við höfum gert það áður og ég hef ekkert á móti því að endurtaka þann leik,“ sagði Viggó Sigurðsson, þjálfari Hauka. „Það er alveg á kristaltæru að það kemur ekkert annað til álita hjá okkur en leggja KA og komast áfram í úrslitaleikina.“


Viðtal við Atla Hilmarsson þjálfara KA (Mbl. 24. apríl 2002)

Búum okkur undir miklar orrustur

„Við erum alls ekki kvíðnir fyrir því að hefja þetta einvígi á útivelli, það gekk vel á móti Gróttu/KR fyrir sunnan og því verður allt lagt í sölurnar á Ásvöllum,“ sagði Atli Hilmarsson, þjálfari KA, sem mætir með lærisveina í Hafnfarfjörðinn í kvöld gegn Íslands- og bikarmeisturum Hauka. „Eftir sigurinn á Gróttu/KR fengum við kærkomna hvíld frá handknattleik og nú er menn farið að klæja í lófana að komast út á völlinn á nýjan leik,“ segir Atli sem er hvergi banginn.

Haukar og KA mættust í fimm leikja einvígi um Íslandsmeistaraitilinn í fyrravor og þá höfðu Haukar betur í oddaleik í KA-heimilinu. Nú vonast Atli eftir að fá byr í seglin og vinna á Ásvöllum. „Við þurfum að vinna einn útileik og einn heimaleik til þess að komast í úrslitin og ég held að það sé best að vinna strax á útivelli,“ segir Atli og er ákveðinn í að ekkert verði gefið eftir í þessum síðustu leikjum KA undir hans stjórn.

„Þessi lið hafa tekist hressilega á á síðustu misserum. Við eigum harma að hefna frá lokum síðasta Íslandsmóts. Nú er það hlutverk okkar að sýna það og sanna að okkur þyrstir í að ná titlinum,“ segir Atli en dregur ekki dul á að það verður við ramman reip að draga þar sem Haukar hafa verið með sterkasta liðið hér á landi undanfarin ár. „Haukar eru mjög sterkt lið sem hefur sýnt hvers það er megnugt á leiktíðinni. En á móti kemur að mér finnst vera stígandi í okkar leik. Þegar komið er út í baráttu sem þessa snýst málið oft um hungur og vilja og ég finn að sú löngun er fyrir hendi í mínum herbúðum.“

Atli segir að flestir leikmenn sækist eftir að komast í úrslitakeppnina, þar er stemmningin meiri en í deildarleikjunum. Yfirleitt er fullt hús áhorfenda og mikil skemmtun, þannig að þeir sem einu sinni hafa tekið þátt í þessu séu tilbúnir að vaða eld og brennistein til þess að komast sem lengst.

„Það er óneitanlega komin eftirvænting í minn hóp fyrir þessu einvígi við Haukana. Undirbúningur hefur verið eins góður og kostur er á,“ segir Atli.

Að mati Atla leynist helsti styrkleiki Haukanna í góðum varnarleik og hraðaupphlaupum. „Við verðum að koma í veg fyrir að þeir fái hraðaupphlaup. Til þess verðum við að leika agaðan og skynsamlegan sóknarleik. Við megum alls ekki fá tíu til tólf mörk úr hraðaupphlaupum á okkur. Takist að koma í veg fyrir það, óttast ég ekki að við höfum ekki styrk til þess að mæta þeim í vörninni ef við á annað borð komumst í hana. En það er algjört lykilatriði að koma í veg fyrir hraðaupphlaupin,“ segir Atli og telur sína sveit vera vel í stakk búna að mæta Haukum jafnt í vörn sem sókn. „Í vetur höfum við þróað með okkur nokkur afbrigði varnarleiks þannig að sú hlið á að vera í fínu standi hjá okkur.“

Reiknar þú ekki með þremur leikjum? „Helst vildi ég að leikirnir gætu aðeins orðið tveir, það er að við vinnum báða, en það er afar sennilegt að úrslitin ráðist í þremur leikjum þar sem hart verður tekist á. Við búum okkur undir miklar orrustur,“ segir Atli Hilmarsson, þjálfari KA.

Eftirfarandi frétt var í Morgunblaðinu þriðjudaginn 24. apríl, 2002 daginn sem viðureign liðanna hófst.

Rúnar tæplega með Haukum

Rúnar Sigtryggsson, landsliðsmaður úr Haukum, verður að öllum líkindum ekki með félögum sínum gegn KA í kvöld, í fyrstu viðureign liðanna í undanúrslitum Íslandsmótsins. Meiðsli í lærvöðva tóku sig upp hjá honum í fyrri leiknum við FH í 8-liða úrslitum og lék hann af þeim sökum ekki með í síðari leiknum sl. föstudag. „Þetta er mjög slæm meiðsli sem Rúnar hefur glímt við allt frá Evrópumeistaramótinu í Svíþjóð og þau tóku sig upp gegn FH,“ sagði Viggó Sigurðsson, þjálfari Hauka, í samtali við Morgunblaðið í gær. „Ég reikna því síður með að Rúnar geti leikið með okkur að þessu sinni. En við Haukamenn kvörtum ekki þar sem við höfum úr stórum og góðum hópi leikmanna að velja. Það er hins vegar alltaf slæmt að missa menn út, ekki síst þegar um er að ræða reynslumikla landsliðsmenn,“ sagði Viggó ennfremur.

Aron Kristjánsson hefur átt í meiðslum í nára, en að sögn Viggós er Aron allur að koma til. „Aron gat tekið góða æfingu á mánudaginn þannig að ég er bjartsýnn á að hann geti verið með af fullum krafti.“
Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson