Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
    Fréttir                       Þú flettir milli frétta með örvalyklunum eða smellir á bláu örvarnar! 

Valsmenn gerðu sitt í fyrsta leiknum

25. apríl 2010 - Akureyri handboltafélag skrifar

Úrslitakeppnin 2002: Valur - KA (leikur 1)

Þar er komið sögu í upprifjun okkar frá árinu 2002 að Valur og KA sigruðu einvígi sín í 4 liða úrslitunum og fyrsti leikur í lokarimmunni fór fram fimmtudaginn 2. maí. Valsmenn áttu heimaleikjaréttinn og því mættu Akureyringar til leiks á Hlíðarenda (þáverandi nafn á heimavelli Valsara).

Við höldum áfram að birta efni Morgunblaðsins og DV-Sport frá þessum viðureignum og verður að viðurkenna að umfjöllun dagblaðanna í dag stenst engan samanburð við glæsilega umfjöllun blaðanna á þessum tíma.

Byrjum á umfjöllun Morgunblaðsins sem birtist föstudagsblaðinu 3. maí. Það er Ívar Benediktsson sem skrifar:

YFIRVEGUN, agi og útsjónarsemi auk öflugs varnarleiks færðu Valsmönnum sigur í framlengingu í fyrsta leik úrslitarimmunnar við KA um Íslandsmeistaratitilinn, 26:22. Um tíma mátti vart á milli sjá hvort liðið færi með sigur af hólmi í kaflaskiptum leik sem þurfti að framlengja til að knýja fram úrslit, staðan var, 20:20 eftir hefðbundinn leiktíma, en jafnt var í hálfleik, 12:12.

KA-menn mættu mjög ákveðnir til leiks, minnugir þess erfiðis sem liðið lenti í gegn Haukum í fyrstu viðureign liðanna í undanúrslitum. Sóknarleikur norðanmanna einkenndist framan af af þolinmæði gegn sterkri, flatri 6/0-vörn Valsliðsins. Heimamenn voru hins vegar spenntir, sóknarleikurinn ráðleysislegur gegn framliggjandi 3/2/1-vörn KA sem sótti sóknarmenn Vals langt fram á völlinn. KA-liðið var í heild sterkara í fyrri hálfleik, hafði frumkvæðið lengst af. Halldór Sigfússon fór mikinn í sókninni og virtist þekkja snöggu blettina á Roland Eradze í marki Vals. Þegar leið á hálfleikinn kom meiri hreyfing á sóknarmenn Vals og við það sköpuðust færin, einkum var Freyr Brynjarsson drjúgur að leysa inn úr horninu, bak við varnarmenn KA og inn á línuna og fá boltann í opnum færum. Mörk Freys og nokkur hraðaupphlaup héldu í raun lífinu í Valsliðinu lengst af í fyrri hálfleik því þótt vörnin væri sterk náði Eradze sér ekki á strik í markinu. Vörn KA stóð mjög í sóknarmönnum Vals og Egidijus Petkevicius fór á kostum í marki KA og varði vel. Þrátt fyrir frumkvæðið gekk KA ekkert að hrista Valsmenn af sér og áður en gengið var til búningsklefa að loknum fyrri hálfleik hafði val tekist að jafna, 12:12.


Hér fær Heimir Örn Árnason óblíðar móttökur frá Sigfúsi Sigurðssyni, Snorra Guðjónssyni og Bjarka Sigurðssyni. Mynd: mbl

Valsmönnum tókst að berja í brestina í leikhléinu og í byrjun síðari hálfleiks var allt annað að sjá til liðsins en áður. Mikil hreyfing var á sóknarmönnum liðsins með þeim afleiðingum að þeir opnuðu vörn KA hvað eftir annað. Þá batnaði varnarleikur Vals til muna auk þess sem Eradze tók að verja allt hvað af tók. Um miðjan síðari hálfleik var forysta Vals orðin fjögur mörk og liðið virtist hafa öll ráð í hendi sér. Stemmningin sem einkenndi KA í fyrri hálfleik var fyrir bí, yfirvegun skorti í sókninni og greinileg þreytumerki farin að gera vart við sig í vörninni. En eins og svo oft áður þarf lítið til þess að koma KA-liðinu á sporið á nýjan leik. Taugaveiklun greip um sig í herbúðum Vals, það var sem menn óttuðust að vinna, hvert opið færið fór í súginn á fætur öðru. Á síðustu 13 mínútum venjulegs leiktíma tókst Val aðeins að skora eitt mark, færin skorti ekki, en nýting þeirra var slæm. Þetta nýtti KA-liðið sér til hins ýtrasta. Það seiglaðist áfram og þótt ýmislegt væri því mótdrægt á síðustu tíu mínútunum fór svo að hálfri annarri mínútu fyrir leikslok jafnaði Halldór úr vítakasti eftir að Eradze hafði með stuttu millibili varið tvö vítaköst kollega Halldórs í KA-liðinu.

Valur fór upp í sókn og 35 sekúndum fyrir leikslok fékk það vítakast um leið og Heimi Erni Árnasyni, KA-manni, var vísað af leikvelli. Petkevicius gerði sér lítið fyrir og varði vítakastið frá Markúsi Mána Michaelssyni. KA-menn stóðu skyndilega með pálmann í höndunum, liðið gat tryggt sér sigur. Það lánaðist ekki og framlengja þurfti.


Markús Máni Michaelsson gnæfir hér yfir KA-manninn Andrius Stelmokas. Mynd: mbl

Það virðist vera sem framlengingar séu sérgrein Vals. Að þessu sinni var líkast því að aðeins eitt lið væri á vellinum þegar að henni kom. Markús Máni fór hamförum og skoraði þrjú af sex mörkum Vals. KA-liðið var sem slegið út af laginu og tókst ekki að klóra í bakkann fyrr en sjö mínútur voru liðnar, þá hafði Valur skorað fjögur mörk. Munurinn var of mikill og Valur vann fyrstu orrustu stríðsins.

Í síðari hálfleik leystu Valsmenn sóknarhlutverkið vel eftir brösótt gengi í fyrri hálfleik. Vörn þeirra var hins vegar geysisterk og ekki síst eftir að Eradze komst í gang í síðari hálfleik. Enda segir sú staðreynd að KA skoraði aðeins 22 mörk á 70 mínútum sitt. Ljóst er að KA verður að brjóta þessa vörn á bak aftur ætli liðið sér að verða Íslandsmeistari, til dæmis með því að fá meiri nýtingu út úr hornamönnum sínum, það þýðir ekkert að sækja inn á miðja vörn Vals þar sem hún er hvað sterkust. KA verður að „keyra“ veikleikana og þeir eru fyrir hendi ef vel er leitað. Eitt er víst; stuðningsmenn beggja liða fengu aðeins smjörþefinn af því sem koma skal að Hlíðarenda í gærkvöldi. Það er jafn ómögulegt að spá fyrir um úrslit þessa einvígis nú og áður en það hófst.

Gangur leiksins: 0:2, 3:2, 4:4, 4:6, 8:10, 10:12, 12:12, 12:13, 15:14, 16:15, 19:15, 19:17, 20:17, 20:20, 21:20, 22:20, 24:20, 25:21, 26:22.

Mörk Vals: Snorri Steinn Guðjónsson 7/2, Markús Máni Michaelsson 6/1, Freyr Brynjarsson 5, Bjarki Sigurðsson 4, Ásbjörn Stefánsson 2, Sigfús Sigurðsson 2.
Utan vallar: 6 mínútur.

Mörk KA: Halldór Sigfússon 8/4, Andrius Stelmokas 4, Heiðmar Felixson 3, Heimir Örn Árnason 3, Jónatan Magnússon 2, Einar Logi Friðjónsson 1, Sævar Árnason 1.
Utan vallar: 10 mínútur.

Dómarar: Stefán Arnaldsson og Gunnar Viðarsson, höfðu góð tök á leiknum og stigu vart feilspor.
Áhorfendur: 750.

Atli Hilmarsson var í viðtali við Stefán Stefánsson hjá Morgunblaðinu eftir leikinn.

Ekki sjálfgefið að vinna heimaleikinn

„Ég er auðvitað sár og svekktur því við náðum að jafna og mér fannst við vera komnir með þá í lok venjulegs leiktíma,“ sagði Atli Hilmarsson þjálfari KA eftir leikinn. „En við vorum einum færri síðustu mínúturnar og byrjuðu framlenginguna líka þannig. Það var dálítið erfitt og við áttum okkur ekki viðreisnar von eftir það því Valur skorar strax og við fundum okkur ekki í framlengingunni. Ég var ósáttur við hvað við fengum á okkur mikið af mörkum úr hraðaupphlaupum og líka úr hornunum en ég var ánægður með vörnina þegar hún var komin á sinn stað. Það tók auðvitað á að vinna upp nokkurra marka forskot Vals en verst var að missa menn útaf og það var vendipunktur. Menn börðust þó áfram og ég var ánægður með það enda tókst að jafna og við vorum mjög nálægt sigri,“ bætti Atli við og taldi heimasigur ekki vísan. „Það er nóg eftir ennþá og við verðum að hafa trú á að við getum unnið þá. Það er mjög gott að komast í heimaleik en alls ekki sjálfgefið að vinna þá á Akureyri og við verðum að spila mjög góðan leik til að sigra þar. Við eigum hinsvegar fullt inni og eigum eftir að sýna það.“

Heiðmar Felixsson var í viðtali við SMS í DV-Sport

Veit ekki hvað gerðist hjá okkur

Er ekki í lagi að ég fái mér sæti?“ segir Heiðmar Felixson, leikmaður KA, og dæsir þegar blaðamaður DV nær tali af honum eftir leikinn. Hann var eins og gefur að skilja ekki sáttur með úrslitin né eigin spilamennsku og telur að bæði hann og liðið í heild eigi mikið inni, „Ég veit ekki alveg hvað gerðist í kvöld hjá okkur en við gáfumst þó aldrei upp frekar en venjulega en þó var lítið eftir af pústinu í framlengingunni og spurning hvort hungrið hafi verið nógu mikið hjá okkur. Þetta er þó langt frá því að vera búið enda eru þessi tvö lið mjög áþekk að styrkleika og spila bæði hraðan og skemmtilegan bolta og það er varla hægt að fá betri eða skemmtilegri úrslitaleiki,“ sagði Heiðmar Felixson. –SMS
Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson