Hreiðar Levý Guðmundsson í viðtali við Morgunblaðið


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Hreiðar með landsliðinu í KA heimilinu		19. júní 2014 - Akureyri handboltafélag skrifar Hreiðar Levý Guðmundsson í viðtali við Morgunblaðið Skömmu eftir að ljóst var að markvörðurinn Hreiðar Levý Guðmundsson gengi aftur til liðs við Akureyri Handboltafélag ræddi Þorkell Gunnar Sigurbjörnsson, blaðamaður Morgunblaðsins við Hreiðar um heimkomuna og ýmiss vandræði sem fjölskyldan hefur gengið í gegnum í Noregi vegna húsnæðismála o.fl. Viðtalið fer hér á eftir: „Ég var eiginlega búinn að gefa allt frá mér og búinn að segja við umboðsmanninn minn að vera ekkert að leita að neinum félögum fyrir mig, því ég kæmist eiginlega ekkert í burtu frá Noregi. Ég væri eiginlega bara í fangelsi í þessu húsi,“ sagði handboltamarkvörðurinn Hreiðar Levý Guðmundsson, en hann hefur staðið í löngu máli vegna húsnæðisins sem hann býr í og á í Noregi og hamlaði honum að flytja annað til að spila handbolta. „Ég hefði þá þurft að skilja fjölskylduna mína eftir í einhverju rugli í Noregi ef ég hefði ætlað að spila annars staðar,“ sagði Hreiðar við Morgunblaðið, en Hreiðar Levý hefur nú samið við Akureyri handboltafélag um að leika með liðinu í Olís-deild karla á næstu leiktíð. „Við erum búin að vera í löngum málaferlum vegna hússins sem við höfum búið í hérna í Noregi. En við erum loksins búin að semja við tryggingafélagið og getum gert við það sem þarf og svo selt húsið í kjölfarið. Þremur mánuðum eftir að við fluttum inn komu alls kyns skemmdir og fleira í ljós í húsinu og við höfum verið í hörku baráttu við tryggingafélagið og með alls kyns lögfræðinga í málinu. En þetta leystist skyndilega fyrir skömmu og þá voru Akureyringarnir ennþá áhugasamir um að fá mig og þá ákvað ég að kýla á það tilboð,“ sagði Hreiðar sem var meðal annars með áhugavert tilboð frá liði í Danmörku. Hreiðar í ham með íslenska landsliðinu. Mynd: mbl.is Hugurinn var farinn að leita heim Hreiðar reiknar þó ekki með því að spila með Akureyringum fyrr en í október eða nóvember þar sem hann þarf að gangast undir aðgerð á hné eða jafnvel báðum hnjám. „Það þarf að taka brjósk bakvið hnéskelina. Ég fer væntanlega í aðgerð á Íslandi núna í júlí. Það stoppaði þetta meðal annars með danska liðið. Svo var hugurinn bara farinn að leita heim. Þannig ég er bara mjög sáttur með þessi málalok að vera á leið til Akureyrar,“ sagði Hreiðar sem lék með Akureyri fyrsta árið eftir að Akureyri handboltafélag var stofnað veturinn 2006-2007, en hélt svo í atvinnumennsku og hefur verið í henni síðan. Um leið og tilkynnt var um að Hreiðar Levý hefði samið við Akureyri var jafnframt sagt frá því að Ingimundur Ingimundarson, félagi Hreiðars úr íslenska landsliðinu, hefði samið við Akureyri. Þeir Hreiðar og Ingimundur léku saman í fjögur ár með ÍR hér á árum áður. Vildi spila með Ingimundi „Við Ingimundur höfum verið bestu vinir í langan tíma. Við höfum oft talað um að það gæti verið gaman að spila aftur saman. Við reyndum stundum að finna eitthvert lið úti þar sem við gætum verið báðir fyrir nokkrum árum. Hann hafði nú áhrif á að ég fór í ÍR á sínum tíma líka. En nú sameinumst við á Akureyri,“ sagði Hreiðar. Hann, Ingimundur og Sverre Jakobsson munu mynda gríðarlega sterka vörn hjá Akureyri. „Já, þetta gæti orðið sterk vörn. En ég veit ekkert ennþá með sóknina. Ég sá nú ekkert mikið af Akureyrarliðinu í vetur. Maður var nú að reyna að rembast við hérna í Noregi. En það var nú frekar erfitt að ná því í gegnum vefsíðuna hjá RÚV oft og tíðum. Það gekk voðalega sjaldan. En ég þekki fáa leikmenn þarna fyrir norðan.“ Missir internetið sem sinn besta vin Hreiðar hefur ekkert leikið fyrir íslenska landsliðið síðan í byrjun síðasta árs. Með Aron Rafn Eðvarðsson meiddan hefði það verið mikill styrkur fyrir íslenska landsliðið að njóta krafta Hreiðars í umspilsleikjunum fyrir heimsmeistaramótið gegn Bosníu. Hreiðar lék vel með Nötteroy í Noregi í vetur og átti stórleik í lokaleik tímabilsins þegar Nötteroy hélt sér í efstu deild. Hreiðar með mikilvæga vörslu í lokaleiknum með Nøtterøy „Aron landsliðsþjálfari hafði nú samband við mig fyrir eiginlega löngu með að koma inn í landsliðið í þessa umspilsleiki. En ég er bara einfaldlega ekki heill. Það var ákveðinn rembingur að klára tímabilið í Noregi. Ég var sprautaður með einhverjum deyfisprautum fyrir síðustu leikina, sem var ekkert sérlega spennandi og æfði næstum ekkert síðasta mánuðinn,“ sagði Hreiðar sem er spenntur fyrir heimkomunni til Íslands. „Það verður gaman að upplifa smá-samfélag. Það er alveg kominn tími á að missa internetið sem besta vin sinn,“ sagði handboltamarkvörðurinn Hreiðar Levý Guðmundsson.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson