Heimir lítur yfir ferilinn - 3. hluti - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Heimir mætti aftur á heimaslóðir og var lykilmaður í velgengni Akureyrar		20. janúar 2016 - Akureyri handboltafélag skrifar Heimir lítur yfir ferilinn - 3. hluti Þá er komið að þriðja og lokahluta viðtals okkar við Heimi Örn Árnason um ferilinn. Hér fjöllum við um endurkomuna norður og fáum hann til að búa til draumaliðið sitt. Ef þið hafið ekki lesið fyrri hlutana þá mælum við eindregið með því að kíkja á þá. Heimir lítur yfir ferilinn - 1. hluti Heimir lítur yfir ferilinn - 2. hluti Alla tölfræði Heimis með liði Akureyrar sem og myndaalbúm með honum má nálgast með því að smella hér. Nú varstu á tímabili hreinlega með áskrift að háttvísisverðlaunum HSÍ, varstu í alvörunni svona prúður á vellinum? Já ég fékk háttvísisverðlaunin þrisvar sinnum, það eru verðlaun sem dómarar velja fyrir háttvísi. Þessi verðlaun komu mér alltaf jafn mikið á óvart! En ætli að þetta tuð í mér hafi ekki bara farið svona vel í dómarana, enda var nú alltaf stutt í húmorinn líka. Heimir er með 33% markvörslu fyrir Akureyri Handboltafélag Svo kemur loksins að því að snúa til baka norður og þú gengur til liðs við Akureyri Handboltafélag, hvernig var að koma aftur norður og að leika með hinu sameinaða liði? Það var mjög góð tilfinning, gott að koma heim og spila með gömlu félögunum. Við spiluðum ágætlega þetta tímabil og unnum marga góða sigra. En duttum niður í lok tímabils og það endaði með tapleikjum á móti Val í undanúrslitunum. Samt sem áður var greinilegt að það væri stutt í toppinn og við þyrftum ekki mikið til að ná þeim liðum. Hér má sjá nokkur tilþrif hjá Heimi með Akureyri á árunum 2010 og 2011. Gengi félagsins varð betra og betra eftir komu þína og nær hámarki árið 2011 þegar liðið verður Deildarmeistari og fer í úrslit Íslandsmótsins, Bikarsins og Deildarbikarsins. Það hlýtur að vera svekkjandi að þetta lið hafi ekki náð fleiri titlum en raun bar vitni? Frábært tímabil en samt svo svekkjandi. Við hefðum átt að taka að minnsta kosti einn titil í viðbót. En það er samt ógleymanlegt þegar maður kom inn í Kaplakrika í fjórða leiknum í úrslitunum á móti FH. Hálfur Kaplakriki voru Akureyringar að styðja sitt lið, frábær stuðningur. Þetta ár fékk ég Valdimarsbikarinn á lokahófinu (innskot: Valdimarsbikarinn er afhentur þeim leikmanni sem þykir vera mikilvægastur). Ég hafði aldrei fengið þann bikar áður og fannst það mikill heiður. Deildarmeistari með Akureyri 2011 fyrir framan troðfulla Höll Þú og Bjarni Fritzson takið síðan við liði Akureyrar sem spilandi þjálfarar. Nú hefur oft verið sagt að það sé erfitt að vera spilandi þjálfari og einnig að það sé gríðarlega erfitt að vera með tvo aðalþjálfara, hvernig fannst þér ganga að púsla þessu öllu saman? Að þjálfa var mjög lærdómsríkt. Samstarfið hjá mér og Bjarna gekk vel og ef við hefðum ekki verið svona ógeðslega óheppnir með meiðsli þá hefði árangurinn verið miklu betri. En það eina sem ég sé eftir í öllu þessu er að hafa ekki hugsað betur um mig sem leikmann þrátt fyrir að hafa þjálfað á sama tíma. Ég er til dæmis í betra standi núna sem dómari en þegar ég var að spila árið 2013! Heimir skoraði mest 11 mörk í leik fyrir Akureyri og kom það gegn Aftureldingu þann 21. mars árið 2013 Þegar þú lítur aftur til baka yfir þennan magnaða feril hvað stendur uppúr og er eitthvað augnablik sem er eftirminnilegra en önnur? Þetta er auðveld spurning. Tímabilið 2002 þegar við urðum Íslandsmeistarar var klárlega það eftirminnilegasta. Annars er ég þokkalega sáttur við ferilinn, það hefði verið gaman að taka þrjú til fjögur ár í viðbót erlendis en í heildina er ég ánægður með minn feril. Heimir tryggði KA hreinan úrslitaleik um Íslandsmeistaratitilinn 2002 með sigurmarkinu í fjórða leiknum gegn Val í KA-Heimilinu Þú hefur komið sterkur inn í dómgæsluna að undanförnu og strax búinn að dæma í efstu deild, stefnirðu langt í dómgæslunni eða stefnir hugurinn kannski aftur út í þjálfun? Þetta er búið að vera mjög skemmtilegt. Ég er með topp makker (Sigurður H. Þrastarsson) þannig að þetta hefur gengið vel hjá okkur. Varðandi framtíðarplön þá finnst mér mjög gaman að þjálfa og aldrei að vita hvað gerist í framtíðinni. En í dag er ég dómari og ætla að halda því eitthvað áfram sérstaklega á meðan það gengur svona vel! Samskipti Heimis við dómarastéttina voru góð og er hann nú sjálfur kominn með flautuna Þú hefur leikið með mörgum af allra bestu leikmönnum Íslands, hvernig væri draumalið af þeim leikmönnum sem þú hefur spilað með? Úff! Til að særa engan þá verð ég stundum að hafa tvo leikmenn í hverri stöðu. Á þessum tæpu 20 árum er ég pottþétt að gleyma einhverjum snilling, en þessir koma fyrst upp í hugann. Vinstra horn: Baldvin Þorsteinsson og Oddur Gretarsson (Sævar Árna var reyndar með 98% nýtingu!) Vinstri skytta: Guðjón Valur í KA og Guðmundur Hólmar (frábært að sjá hann í EM-hópnum) Miðja: Jónatan Magnússon og Halldór Jóhann Sigfússon Hægri Skytta: Óli Stef og Hjalti Pálma Hægra horn: Jóhann Gunnar (Brói) og Bjarni Fritz Lína: Hörður Fannar og Arnar Þór Sæþórsson Markmaður: Hlynur Morthens og Sveinbjörn Pétursson Varnarskiptingar: Guðlaugur Arnarsson og Sigfús Sigurðsson Auka sóknarmaður: Verð að hafa Sigurð Eggertsson! Heimir lék sinn síðasta leik fyrir Akureyri í oddaleiknum gegn ÍR á síðustu leiktíð og má sjá hér myndband frá þeim leik. Heimir er tekinn í viðtal þar sem hann er meðal annars spurður út í dómaramálin.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson