Handboltamenn í Háskólanum á Akureyri - Anna Teresa

Í kringum áramótin kynntum við hér á síðunni handboltamenn sem stunda nám við Háskólann á Akureyri. Einn leikmaður Akureyrar Handboltafélags hóf svo nám nú á vormisserinu þannig að það er ekki seinna vænna en að kynna hann til sögunnar. Þetta er engin önnur en baráttujaxlinn Anna Teresa Morales sem jafnframt handboltanum og uppeldisstörfum leggur stund á viðskiptafræði við HA með megináherslu á fjármál.

Fæðingardagur: 29. maí 1985
Staða: Línumaður

Anna er þekkt fyrir að gefa ekkert eftir á vellinum hvorki í vörn eða í strögglinu á línunni þar sem hún hefur skorað ein 62 mörk á tímabilinu. Anna er reyndar algjör íþróttafíkill og vakti snemma athygli fyrir harðfylgi sitt í öllum boltagreinum. Þannig var það daglegur viðburður að skólabræður hennar í Lundaskóla kæmu bláir og marðir inn úr frímínútum eftir að hún hafði tekið þá í karphúsið í fótbolta, körfubolta eða reyndar hvaða boltagrein sem var.

Eftir stúdentsprófið hélt hún ásamt unnusta sínum, Einari Loga Friðjónssyni í víking til Þýskalands þar sem hún lék einnig handbolta með liðinu TSG Friesenheim.


Anna er lengst til vinstri í fremstu röð



En um námið, þá er viðskiptafræðin skipulögð sem þriggja ára nám sem lýkur með B.Sc. gráðu. Lögð er áhersla á að mennta fólk til að gegna ábyrgðarstöðum í fjármálafyrirtækjum. Mikilvægar námsgreinar eru bókhald, tölfræði, hagrannsóknir, hagnýt stærðfræði, þjóðhagfræði, skattaskil og námskeið í fjármálum þar sem m.a. er fjallað um fjármálamarkaði, afleiður og alþjóðafjármál.

Nemendur sem brautskrást sem viðskiptafræðingar eru eftirsóttir starfskraftar í atvinnulífinu og starfa m.a. sem ráðgjafar, framkvæmdastjórar, fjármálastjórar, starfsmannastjórar og markaðsstjórar. Einnig hefur námið nýst vel þeim sem fara í framhaldsnám, bæði hérlendis og erlendis.

Til upprifjunar þá er hér bent á fyrri kynningar á handboltamönnum Háskólans á Akureyri.

Magnús Stefánsson, grunnskólakennarafræði
Einar Logi Friðjónsson, fjölmiðlafræði
Andri Snær Stefánsson, grunnskólakennarafræði
Þórsteina Sigurbjörnsdóttir, iðjuþjálfun
Arnór Atlason, viðskiptafræði
Inga Dís Sigurðardóttir, grunnskólakennarafræði